ჩრდილო ოსეთის მაცხოვრებლებისათვის, მათთვის ვინც საქართველოს ყაზბეგის რაიონში დაიბადა საქართველოში ჩასვლის აკრძალვა - აშკარა დისკრიმინაციაა. ეს განცხადება რუსეთის საგარეო საქმეთა სამინისტროს ოფიალურმა წარმომადგენელმა ალექსანდრე ლუკაშევიჩმა გააკეთა. ინფორმაციას ამის შესახებ რუსული მედია ავრცელებს.
"რუსული რეგიონის ჩრდილოეთ ოსეთის მოსახლეობასა და მოსაზღვრე საქართველოს ყაზბეგის რაიონს შორის ტრადიციულად კეთილმეზობლური ურთიერთობები არსებობდა. ჩრდილოეთ ოსეთში ამჟამად საკმაოდ მრავალი ადამიანია, რომელთაც იქ სახლები და ნათესავები ჰყავს. სწორედ ამ ადამიანებზე, რომლებიც ეროვნებით ოსები არიან არის მიმართული საქართველოს ხელისუფლების მიერ დაწესებული აკრძალვის ზომები", _ აცხადებს ლუკაშევიჩი და აღნიშნავს, რომ "ყაზბეგის" სასაზღვრო პუნქტში, შექმნილია შესაბამისი მონაცემთა ბაზა სწორედ ამ კატეგორიის მოქალაქეებისა და მათი ნათესავების შესახებ.
"მათ საქართველოში არ უშვებენ", _ აცხადებს სერგეი ლავროვის უწყების ოფიცილური წარმომადგენელი და აღნიშნავს, რომ "საქართველოს მიერ 2010 წელს ცალმხრივად შემოღებული უვიზო რეჟიმი, რომელიც ჩრდილოკავკასიის რესპუბლიკების მაცხოვრებლებისათვის იყო განკუთვნილი ფართოდ რეკლამირდებოდა, როგორც თბილისის კეთილმეზობლობის გამოვლენა ჩრდილოკავკასიელი ხალხების მიმართ".
"უკვე მაშინ იყო ცხადი, რომ საქართველოს ხელისუფლების ნამდვილი განზრახვა სულ სხვაა და ამას ქართულ საზღვარზე ოსების დისკრიმინაციის მაგალითებიც ადასტურებენ. ლამაზი ლოზუნგები "საერთოკავკასიური მეგობრობის" შესახებ სხვა არაფერია, თუ არა თბილისის შოვინისტური პოლიტიკის ყალბი ნიღაბი. სწორედ იმ პოლიტიკისა, რომლის კულმინაცია მიხეილ სააკაშვილის ბრძანება გახდა 2008 წლის 8 აგვისტოს ცხინვალის საცხოვრებელი კვარტლებისათვის გაეხსნათ ცეცხლი", _ აცხადებს ლუკაშევიჩი.