საპარლამენტო ფრაქცია "ერთობა სამართლიანობის" თავმჯდომარის, გიორგი ცაგარეიშვილის შეფასებით, პრეზიდენტმა სააკაშვილმა მედია "ცნობის ფურცლების" გამავრცელებელ ფოსტალიონს დაამსგავსა. ამის შესახებ ცაგარეიშვილმა საერთაშორისო ორგანიზაციის - "რეპორტიორები საზღვრებს გარეშე" - მიერ გამოქვეყნებული პრესის თავისუფლების რეიტინგის შეფასებისას აღნიშნა.
მისი თქმით, უკანასკნელ პერიოდში უკვე სამი საერთაშორისო ორგანიზაციის დასკვნა გამოქვეყნდა, სამივეში საქართველოში მედიის მდგომარეობა მწვავედაა გაკრიტიკებული. მედიის თავისუფლების თვალსაზრისით მდგომარეობის გაუარესება იმის შედეგია, რომ თავის დროზე მიუკერძოებელი გამოძიება არ მოხდა ტელეკომპანია "იმედის" დარბევისა.
"დღესაც კი დაფარულია ხელისუფლებასთან დაახლოებული მედიასაშუალებების მეპატრონეების ვინაობა და ვისიც ცნობილია, ისინიც პირდაპირ დაკავშირებული პირები არიან ხელისუფლებასთან. ეს არის იმის შედეგი, რომ ბეჭდურ მედიას და პრესის გამავრცელებელ სტრუქტურებს გადაულახავი წინაღობები შეუქმნა ხელისუფლებამ როგორც თბილისში, ისე რეგიონებში. ეს არის შედეგი იმისა, რომ ქუჩის მასობრივი გამოსვლების და პროტესტების დროს, სახელისუფლო სადამსჯელო მანქანის პირველი სამიზნე ყოველთვის ჟურნალისტები არიან. ამ ყველაფრის შედეგად კი მივიღეთ პრესის გავრცელების არქაული საშუალება - ურიკა", - აღნიშნა ცაგარეიშვილმა.
მისი შეფასებით, ქართული პრესა 21-ე საუკუნეში გადაჯდა ურიკაზე და მივიდა იქ, საიდანაც დაიწყო მისი ორსაუკონოვანი განვითარების ისტორია.
"მიხიელ სააკაშვილმა ქართული მედია დაამსგავსა ცნობილ ქართულ ფილმში, "ვერისუბნის მელოდიებში" არსებულ ცნობის ფურცლების გამავრცელებელ ფოსტალიონს და ეს ყველაფერი იმიტომ ხდება, რომ როგორც ამავე ფილმშია, სააკაშვილს ბუნტის ეშინია", - აღნიშნა მან.
შეგახსენებთ, რომ საერთაშორისო ორგანიზაციის "რეპორტიორები საზღვრებს გარეშე" 2011 წლის პრესის თავისუფლების რეიტინგში საქართველომ გასულ წელთან შედარებით პოზიცია 5 პუნქტით გაიუარესა და 99-ე ადგილიდან 104-ე ადგილზე გადაინაცვლა.
