რუსეთის პრემიერ-მინისტრი ვლადიმერ პუტინი იმ ფიზიკური და იურიდიული პირების წინააღმდეგ სისხლისსამართლებრივი პასუხისმგებლობის შემოღების გადაწყვეტილებით გამოდის, რომლებიც არალეგალური მიგრაციის პროვოცირებას ახდენენ. ინფორმაციას ამის შესახებ რუსული მედია ავრცელებს.
"სანქციები უნდა გაძლიერდეს მათ მიმართ, ვინც არალეგალური მიგრაციის პროვოცირებას ახდენს, ეს ეხება როგორც ფიზიკურ, ისე იურიდიულ პირებს - მათ, ვინც უკანონო მიგრაციული ნაკადების პროვოცირებას ახდენს, ვინც ასაქმებს ადამიანებს ყოველგვარი ნებართვის გარეშე, რითიც არსებითაც აქ მათ უუფლებო მონების მდგომარეობაში აყენებს", _ აცხადებს პუტინი. ეს განცხადება მან ფედერალური საიმიგრაციო სამსახურის კოლეგიაზე გააკეთა.
რუსეთის პრემიერმა აღნიშნა ისიც, რომ ჯერჯერობით ამგვარი დარღვევებისთვის მხოლოდ სიმბოლური ჯარიმებია დაწესებული. "მიმაჩნია, რომ სისხლისსამართლებრივი ხასიათის სანქციები უნდა იყოს გათვალისწინებული", _ განაცხადა პუტინმა და აღნიშნა, რომ სავარაუდოდ, ყოველივე ეს სისხლის სამართლის კოდექსის 322-ე მუხლში ცვლილებების შეტანას მოითხოვს.
"სავარაუდოდ, რუსეთის ფედერაციის ტერიტორიაზე 5-იდან 10 წლის ვადით, ან შესაძლოა მეტი ხნის ვადითაც, აეკრძალოთ მათ, ვინც საიმიგრაციო კანონმდებლობა არაერთხელ დაარღვია და ქვეყნიდან სასამართლო გადაწვეტილების საფუძველზე იქნა გაძევებული", _ აცხადებს პუტინი და ხაზგასმით აღნიშნავს, რომ რუსეთი არ აპირებს თავი შემოიზღუდოს ვინმესგან, თუმცა "საიმიგრაციო პოლიტიკაში იგი თავისი ქვეყნის მოქალაქეების ინტერესებით იხელმძღვანელებს".
