"დემოკრატიული მოძრაობის" ლიდერის, ნინო ბურჯანაძის განცხადებით, კარგი იქნება, თუ მიხეილ სააკაშვილისა და ბარაკ ობამას შეხვედრა საქართველოს სახელმწიფოებრივ ინტერესებს მოემსახურება.
"უფრო დეტალურად შეხვედრას დასრულების შემდეგ შევაფასებ, მაგრამ კარგი იქნება, თუ ეს შეხვედრა მოემსახურება საქართველოს სახელმწიფოებრივ ინტერესებს. რაც შეეხება რუსეთის რეაქციას ამ შეხვედრასთან დაკავშირებით, არა მგონია, პუტინისთვის ან რუსეთის ხელისუფლებისთვის რამე სიურპრიზს წარმოადგენდეს ის, რომ საქართველოს პრეზიდენტს მონური დამოკიდებულება აქვს აშშ-ის ხელისუფლების მიმართ. მაგრამ მონური მხოლოდ იმ ნაწილში, რომელიც მის პირად ინტერესებს და მის სკამის და ხელისუფლების შენარჩუნებას შეესაბამება. იმ ნაწილში, რომელიც შეიძლება საქართველოს სახელმწიფოს ინტერესებს შეესაბამებოდეს, სააკაშვილისთვის ნებისმიერი რეკომენდაცია, რომელიც შეიძლება წამოვიდეს დასავლეთის მხრიდან, იქნება მეორადი. პირველადი იქნება მხოლოდ ის, რომელის მის ხელისუფლებაში ყოფნის გამყარებას მოემსახურება", - განაცხადა ბურჯანაძემ "ჯი-ეიჩ-ენთან" საუბრისას.
შეგახსენებთ, რომ საქართველოს პრეზიდენტისა და მისი ამერიკელი კოლეგის შეხვედრა 30 იანვარს თეთრ სახლში გაიმართება.
