საქართველოს ნაკრების ყოფილი ფეხბურთელი შოთა არველაძე საქართველოს პრეზიდენტს მიხეილ სააკაშვილს მოუწოდებს საახალწლოდ გიორგი დემეტრაზე გაათავისუფლოს.
"ვფიქრობ, პრეზიდენტის შეუძლია დემეტრაძის განთავისუფლებით საახალწლო საჩუქარი გაუკეთოს საფეხბურთო სამყაროს, თუ გაითვალისწინებს დემეტრაძის დამსახურებას და საფეხბურთო ოჯახის თხოვნას", - განაცხადა არველაძემ გაზეთ "ლელოსთან" საუბრისას.
მისი თქმით, საფეხბურთო სამყაროს უმრავლესობა დემეტრაძეს შეძლებისდაგვარად გვერდში უდგას, არსებობს წერილი-თხოვნა პრეზიდენტისადმი დემეტრაძის განთავისუფლების თაობაზე და ამ წერილს საფეხბურთო სამყაროს საკმაოდ ბევრი წარმომადგენელი აწერს ხელს.
"სამწუხაროდ, ჯერ არ არის გათვალისწინებული დემეტრაძის დამსახურება და საფეხბურთო სამყაროს ეს თხოვნა. როდესაც დამისვეს კითხვა - "იყო თუ არა დემეტრაძე დამნაშავე?", მაშინ მეგონა, რომ დემეტრაძე ტოტალიზატორში თამაშისთვის იყო დაჭერილი და ვთქვი, ყველამ ვიცით, დემეტრაძე ტოტალიზატორში რომ თამაშობს და თუ ამის გულისთვის კაცი ციხეში უნდა იჯდეს, მაშინ ყველა დასაჭერი ყოფილა-მეთქი. მერეღა გავიგე, რომ დემეტრაძე ქურდულ სამყაროსთან კავშირის გამო დაპატიმრებული. ვფიქრობ, სასაცილოა ეს ყველაფერი, კაცს, რომელიც მთელი ცხოვრება ტრუსებში დარბის, რა საქმე უნდა ჰქონდეს ქურდულ სამყაროსთან?!", - აღნიშნა არველაძემ.
