საქართველოს ნაკრების ყოფილი ფეხბურთელის, შოთა არველაძის განცხადებით, კახა კალაძის გამოსათხოვარი მატჩი იქამდე არ ჩატარდება, სანამ დემეტრაძე ციხეშია.
გაზეთ "ლელოსთან" საუბრისას მან ფეხბურთის ფედერაციის განცხადებაზეც ისაუბრა, რომელიც კახა კალაძის ნაკრებიდან წასვლას ეხებოდა და გაოცებული დარჩა.
"როცა ნაკრების ლიდერი გუნდიდან მიდის, ეს ფედერაციას წინასწარ უნდა სცოდნოდა, მაგრამ ეს ფაქტი საქართველოს ფეხბურთის ფედერაციას არ აძლევს უფლებას, რომ კალაძის კარიერას და ნამოღვაწარს ჩრდილი მიაყენოს. თუმცა ამას ვერ გააკეთებს, რადგან ხალხის დაფასება ყოველთვის ყველაფერს გადაფარავს. პირადად მე მადლობას ვუხდი კალაძეს მისი კარიერის გამო", - განაცხადა არველაძემ.
შეგახსენებთ, რომ კალაძის გამოსათხოვარი მატჩის თემით, რამდენიმე დღის წინ "ჯი-ეიჩ-ენიც" დაინტერესდა. როგორც სფფ-ში "ჯი-ეიჩ-ენს" 20 დეკემბერს განუცხადეს, აღნიშნული მატჩის შესახებ ფედერაციაში საუბარი არ ყოფილა.
