ჰოსპიტალური სექტორის განვითარების პროექტის ფარგლებში, ახალი მრავალპროფილიანი საავადმყოფო საქართველოს პრეზიდენტმა მიხეილ სააკაშვილმა ამჯერად ჭიათურაში გახსნა.
"ვიღაცები იძახიან, რა ამოგვიყვანა ყელში თავისი საავადმყოფოებიო... ამას ის იძახის, ვისაც პრობლემა ისედაც არ ჰქონდა. ჩემთვის მთავარია, ხალხში იყოს თანასწორობა, ადრე რაც შეეძლო მილიონერს, მილიარდერს ან რომელიმე გაბღრენძილ პოლიტიკოსს, დღეს შეეძლოს უკლებლივ ყველა თქვენგანს - ჩემთვის ყველაზე ახლობელ ხალხს", _ განაცხადა სააკაშვილმა ჭიათურელების წინაშე სიტყვით გამოსვლისას.
მისი თქმით, ის ჯანდაცვა, რომელიც არის ისრაელსა და ჰოლანდიაში "ჩვენ უნდა მოვიტანოთ, აქ ჭიათურაში".
"ძალიან ბევრი უცხოელი პროფესორი ჩამოვიყვანეთ იმისთვის, რომ მოხდეს გადამზადება და ექიმები გვყავდნენ ისეთები, რომ შეცდომები აღარ მოსდიოდეთ. სადაზღვევო პოლისი იძლევა იმის საშუალებას, რომ ექიმი და ექთანი არ უნდა იყოს თქვენი ხელში შემყურე. ეს პოლისი ფარავს პრაქტიკულად ყველაფერს", _ განაცხადა სააკაშვილმა.
უმაღლესი სტანდარტების შესაბამისი კლინიკა სადაზღვევო კომპანია "ირაომ" ააშენა, რისთვისაც 3 მილიონი ლარის ინვესტიცია განახორციელა. ადგილობრივებს აქ შეუძლიათ ამბულატორიული, თერაპიული, ქირურგიული, სამშობიარო და სხვა მომსახურების მიღება. ახალი ჰოსპიტალი, რომელიც ულტრათანამედროვე აპარატურითაა აღჭურვილი, 25-საწოლიანია და 120-მდე მაღალკვალიფიციური სპეციალისტია დასაქმებული.
