ამომრჩეველთა მოსყიდვასთან დაკავშირებით ახალი რეგულაციების შემოღების შემდეგ მთელი მთავრობა და პარლამენტი დასაჭერი გახდება, - ამის შესახებ ვიცე-სპიკერმა ლევან ვეფხვაძემ პარლამენტის რიგგარეშე სხდომაზე "სისხლის სამართლის კოდექსში" შესატანი ცვლილებების განხილვისას განაცხადა.
მისი თქმით, პოლიტიკური მიზნით პირდაპირ ან არაპირდაპირ მომსახურების გაცემა გულისხმობს ყველა იმ ქმედებას, რასაც დეპუტატები და მთავრობა, ყოველდღიურად აკეთებს, მათ შორის, არის მოქალაქის დასაქმების თუ ჯანდაცვის მომსახურებისთვის დეპუტატის მიერ რომელიმე უწყებისთვის მიმართვა, ასევე, პრეზიდენტის მიერ სტუდენტებისთვის თუ მოსწავლეებისთვს საჩუქრების გადაცემა, განათლებისა და მეცნიერების მინისტრი მიერ კომპიუტერების დარიგება და სხვა.
"ჩვენ ყველა ამას ვაკეთებთ პოლიტიკური მიზნით. საინტერესოა, ვინ უნდა განსაზღვროს რა კეთდება პოლიტიკური მიზნით და რა არა. ამ კანონის მიღების შემდეგ, ჩვენ ყველანი დასაჭერები ვიქნებით. მთელი მთავრობა დასაჭერი იქნება. უხერხული იქნება ამის მიღება ისე, როგორც არის შემოთავაზებული", - მიმართა კანონპროექტის ინიციატორებს ვეფხვაძემ.
მისივე თქმით, "ქრისტიან-დემოკრატები" შავი ფულის წინააღმდეგ ბრძოლის წინააღმდეგენი არ რაიან.
"ფაქტია, რომ შავი ფული ხელისუფლების ხელშია და არა ოპოზიციის", - აღნიშნა ოპოზიციონერმა დეპუტატმა და აქვე დასძინა, რომ კანონპროექტი ინტერპრეტაციების საშუალებას იძლევა.
შეგახსენებთ, რომ "სისხლის სამართლის კოდექსის" მოქმედი რედაქციით, არჩევნების დანიშვნის შესახებ შესაბამისი სამართლებრივი აქტის გამოქვეყნებიდან არჩევნების საბოლოო შედეგების გამოქვეყნებამდე აკრძალულია ამომრჩევლისათვის ფულადი სახსრების, საჩუქრებისა და სხვა მატერიალური ფასეულობების უსასყიდლოდ ან შეღავათიან ფასებში გადაცემა ან მიყიდვა. ასევე, აკრძალულია უფასო მომსახურების გაწევა ან ფულადი სახსრების, ფასიანი ქაღალდებისა და სხვა მატერიალურ ფასეულობათა გადაცემის დაპირება რომელიმე საარჩევნო სუბიექტის მხარდაჭერის ან არჩევნებში ხმის მიცემისგან თავის შეკავების მიზნით. ეს ქმედებები ისჯება თავისუფლების აღკვეთით ვადით ერთ წლამდე.
"სისხლის სამართლის კოდექსში" ცვლილებების პროექტით კი, პარტიას ამომრჩევლის მოსყიდვად ჩაეთვლება პოლიტიკური მიზნით პირდაპირ ან არაპირდაპირ ფულის, ფასიანი ქაღალდის, სხვა ქონების, ქონებრივი უფლების ან მომსახურების ან სხვა რაიმე უპირატესობის შეთავაზება, დაპირება, გადაცემა, გაწევა, ან ასეთის მოთხოვნა ან მიღება. აგრეთვე, პარტიას ეკრძალება მოჩვენებითი, თვალთმაქცური ან სხვა გარიგების დადება კანონით დადგენილი შეზღუდვებისათვის თავის არიდების მიზნით. თუ მოქმედი კანონმდებლობით გათვალისწინებული აკრძალვები მხოლოდ წინასაარჩევნო პერიოდში მოქმედებდა, კანონპროექტით, ასეთი ქმედებები პარტიას ამომრჩევლის მოსყიდვად, ნებისმიერ დროს ჩაეთვლება.
გარდა ამისა, მკაცრდება სასჯელის ზომაც და თუ აქამდე ამომრჩევლის მოსყიდვისთვის სასჯელი ერთწლიანი პატიმრობა იყო, კანონპროექტით სასჯელი სამ წლამდე იზრდება, თუმცა, ჩნდება ჯარიმის ალტერნატივაც. ხოლო იურიდიულ პირებს ამ ქმედებებისთვის ლიკვიდაცია ან საქმიანობის უფლების ჩამორთმევა ემუქრებათ.
