მის უწმინდესობას 2011 წლის „ოქროს პერგამენტის" ახალი ამბების სააგენტო „ჯი-ეიჩ-ენის" გენერალურმა დირექტორმა გოჩა მირცხულავამ გადასცა. მან მადლობა გადაუხადა პატრიაქტს გაწეული მოღვაწეობისათვის და აღნიშნა, რომ პატრიარქი, რომელიც ოქროს პერგამენტით მეორედ ჯილდოვდება, უდიდესი ავტორიტეტით სარგებლობს საქართველოს მოსახლეობაში.

„ეს არის ჩვენი თანამოქალაქეების მიერ თქვენს მიმართ მადლიერების სიმბოლური გამოხატულება", - აღნიშნა პატრიარქთან შეხვედრისას გოჩა მირცხულავამ.

თავის მხრივ, ილია მეორემ მადლობა გადაიხადა „ოქროს პერგამენტით" დაჯილდოვებისთვის და საქართველოს მოსახლეობასა და ოქროს პერგამენტის ყველა ლაურეატს წარმატებები უსურვა.

„ღმერთმა დაგლოცოთ. ჩემთვის ყველაზე ძვირფასი არის ის, რომ მე უნდა ვემსახურო ჩვენს ერს. ესაა ჩემი მიზანი, მეტი არაფერი", - განაცხადა საქართველოს კათალიკოს პატრიარქმა ოქროს პერგამენტის გადაცემისას.

პატრიაქმა მოუწოდა პერგამენტის ყველა ლაურეატსა და ნომინატს, რომ მთავარ საზრუნავად სამშობლო და ადამიანი გაიხადონ.

„უპირველეს ყოვლისა, ჩვენ ვართ ქართველები, უნდა გვახსოვდეს საქართველო და უნდა ვზრუნავდეთ საქართველოსთვის. მე, მახსენდება ჩვენი ილიას, წმინდა ილიას სიტყვები "მამული, ენა, სარწმუნოება". მე ცოტა დავუმატე მას და ვთქვი - "ღმერთი, სამშობლო და ადამიანი". ყველაზე ძვირფასი ღვთის წინაშე არის სამშობლო და ადამიანი. ადამიანებს უნდა გავუფრთხილდეთ. ქართველი ხალხი უნდა დაბრუნდეს უცხოეთიდან. ქართველებმა უნდა იზრუნონ ჩვენს სამშობლოზე. სხვა ვერავინ ვერაფერს გააკეთებს. ჩვენ თვითონ უნდა ვუშველოთ ჩვენს თავს", - აღნიშნა საქართველოს პატრიაქმა.

შეგახსენებთ, რომ ახალი ამბების სააგენტო „ჯი-ეიჩ-ენის" ორგანიზებით წლის ადამიანებისა და კომპანიების დაჯილდოების ცერემინილი - „ოქროს პერგამენტი" 24 დეკემბერს იმართება და მას კომპანია ბაგრატიონი 1882-ის დარბაზი მასპინძლობს.

2011 წელს გამარჯვებულები 11 ნომინაციაში გამოვლინდნენ, ასევე გაიცა საპატიო „ოქროს პერგამენტიც". გამარჯვებულების გამოსავლენად გამოკითხვა მთელი საქართველოს მასშტაბით ჩატარდა და მასში მონაწილეობა 2986-მა რესპოდენტმა მიიღო.

საკონსულტაციო ჯგუფი GCG-ის მიერ ჩატარებულ კვლევაში რესპოდენტების რაოდენობა შემდეგნაირად გადანაწილდა: თბილისი - 42%, კახეთი - 9%, ქვემო ქართლი - 7%, შიდა ქართლი - 6%, იმერეთი - 10%, სამეგრელო - 10%, გურია - 3%, მცხეთა მთიანეთი - 3%, აჭარა - 10%.

რაც შეეხება გამოკითხულთა სოციალურ მდგომარეობას, აქ სტატისტიკა ასე გამოიყურება: სტუდენტი - 10%, დასაქმებული - 29%, თვითდასაქმებული - 23%, უმუშევარი - 24%, პენსიონერი - 14%.

გამოკითხულთა შორის 53% ქალია, ხოლო 47% მამაკაცი.

წელს „ოქროს პერგამენტის" დაჯილდოების ცერემონიალის სპონსორები იყვნენ კომპანიები ავერსი, გუდვილი, ნატალი და ფლაუერსი.