"ქრისტიან-დემოკრატების" წევრის, ვიცე-სპიკერ ლევან ვეფხვაძის შეფასებით, "მოქალაქეთა პოლიტიკური გაერთიანებების შესახებ" კანონი პოლიტიკურად აქტიურ პირებს გაჭირვებული ადამიანების დახმარებას უკრძალავს.
როგორც ვეფხვაძემ დღეს პარლამენტის რიგგარეშე სხდომაზე აღნიშნა, კანონში შესული ცვლილებების შემდეგ დეპუტატებს არ ექნებათ უფლება, პარლამენტის კართან მომლოდინე გაჭირვებულ ადამიანებს დახმარების ხელი გაუწოდონ და მცირეოდენი თანხით დაეხმარონ.
"საახალწლოდ და სხვა დღესასწაულებზე ხშირად დავდივართ გაჭირვებულ ოჯახებში და მიგვაქვს საჩუქრები. ამ კანონით კი ბავშვებთან კანფეტებით და ოჯახებში საჩუქრით მისვლა უნდა აგვეკრძალოს", - აღნიშნა დეპუტატმა და დასძინა, რომ თუ პარტიას არასაარჩევნო პერიოდშიც აეკრძალება საჩუქრების გადაცემა, ეს უსამართლობა იქნება.
შეგახსენებთ, რომ "მოქალაქეთა პოლიტიკური გაერთიანებების შესახებ" ცვლილებების თანახმად, პარტიას ეკრძალება - კანდიდატის, წარმომადგენლის ან სხვა პირის მეშვეობით საქართველოს მოქალაქეებისთვის ფულადი სახსრების, საჩუქრებისა და სხვა მატერიალურ ფასეულობათა გადაცემა, შეღავათიან ფასად საქონლის მიყიდვა, საბაზრო ფასზე მეტად საქონლის შესყიდვა, უფასოდ ნებისმიერი საქონლის (გარდა ამ კანონით გათვალისწინებული გამონაკლისებისა) მიწოდება ან გავრცელება, აგრეთვე საქართველო მოქალაქეების დაინტერესება ფულადი სახსრების, ფასიანი ქაღალდებისა და სხვა მატერიალურ ფასეულობათა გადაცემის დაპირებით.
