საქართველოს პრეზიდენტი მიხეილ სააკაშვილი კანში ამერიკული აკადემიის დაჯილდოების ყოველწლიურ ცერემონიას დაესწრო, რომელზეც ნომინანტებს შორის პირველად მოხვდა საქართველო, კერძოდ კი - აჭარის რეგიონი. ამერიკული აკადემიის გადაწყვეტილებით, რეგიონმა სამ ნომინაციაში გაიმარჯვა:
1) ბათუმი, როგორც საუკეთესო, ახალი საკურორტო ქალაქი.
2) აჭარის ავტონომიური რესპუბლიკა, როგორც ინვესტორების მიმართ ყველაზე მეგობრულად განწყობილი რეგიონი.
3) პრიზი ინოვაციური მმართველობისთვის - ლევან ვარშალომიძე.
"ჩემთვის დიდი პატივია აქ ყოფნა, რადგან თუ რომელიმე ქალაქი ბათუმს მაგონებს, ეს არის კანი და ნიცა. სხვათაშორის, იმავე არქიტექტორის მიერ არის აშენებული, ვინც ნიცა ააგო. ქალაქში თქვენ შეგიძლია მე-19 საუკუნის ულამაზესი არქიტექტურა იხილოთ, მაგრამ იქ ასევე უამრავი თანამედროვე შენობაა. გამორჩეული არქიტექტურის შექმნაზე გამორჩეული ბრიტანელი, იტალიელი, გერმანელი და ქართველი არქიტექტორები მუშაობენ. ბათუმი ერთადერთი ქალაქია შავ ზღვაზე, რომელსაც ასეთი ლამაზი სანაპირო აქვს", - განაცხადა დაჯილდოების ცერემონიაზე მიხეილ სააკაშვილმა.
როგორც პრეზიდენტის ადმინისტრაცია იუწყება, ამერიკული აკადემია მსოფლიო ტურისტულ ბაზარზე მოთამაშე წარმატებულ ქვეყნებს, კომპანიებს და მომსახურეობის სხვადასხვა სექტორის საუკეთესო წარმომადგენლებს აჯილდოვებს. მსოფლიო მასშტაბით, ტურისტულ სექტორში ამერიკული აკადემიის ჯილდო ყველაზე პრესტიჟულ პრემიად მიიჩნევა.
