გენიალური ქართველი მსახიობის ოჯახს საქართველოს პრეზიდენტმა მიუსამძიმრა. მიხეილ სააკაშვილი რამაზ ჩხიკვაძის საცხოვრებელ სახლში მივიდა და გარდაცვლილის ოჯახს თანადგომა გამოუცხადა. მისამძიმრების შემდეგ პრეზიდენტმა ჟურნალისტებთან ჩხიკვაძის შესახებ ისაუბრა და მასთან ერთი შეხვედრაც გაიხსენა.
"საქართველომ კიდევ ერთი გენიალური პიროვნება დაკარგა. რამაზ ჩხიკვაძე იყო მართლაც გენიალური მსახიობი. ასეთი სახელები ქართულ სცენაზე შეიძლება იყვნენ, მსგავსი მასშტაბის მხოლოდ ვასაძე, ხორავა, ზაქარიაძე მაგრამ მე მათ არ მოვსწრებივარ, ამიტომ იმ ადამიანებისთვის, რომლებიც არიან ჩემი ასაკის ან უფრო ახალგაზრდა, ის იყო ყველაზე დიდი და ის იყო ნამდვილად გენიალური. ის იყო ასევე ძალიან მოკრძალებული ადამიანი", _ განაცხადა პრეზიდენტმა და რამაზ ჩხიკვაძესთან ერთ-ერთი შეხვედრა გაიხსენა.
"მახსოვს, ამ ორი-სამი წლის წინ დაველაპარაკეთ და ვკითხეთ, როგორ დავხმარებოდით მატერიალურად და მან ძალიან მოკრძალებით მოგვიგო: ჩემზე გაჭირვებული ადამიანები არსებობენ, მე პრინციპში არაფერი არ მჭირდება და დაეხმარეთ მათ, ვინც არის უფრო გაჭირვებული ჩვენ გარშემოო", _ გაიხსენა საქართველოს პრეზიდენტმა და აღნიშნა, რომ ბედნიერებაზე ლაპარაკი, როდესაც ასეთი განსაკუთრებული სიცოცხლე წყდება, ძალიან ძნელია.
"მაგრამ ვფიქრობ ხშირად, რომ რამაზ ჩხიკვაზე იყო ძალიან ბედნიერი ადამიანი და ჰქონდა ბედნიერი ცხოვრება იმიტომ, რომ მას პრაქტიკულად მთელი შეგნებული ცხოვრება თან ახლდა ხალხის უპირობო სიყვარული. ასევე მინდა ვთქვა, რომ ჩვენ ვიყავით ბედნიერები, ვისაც ის უნახავს არა მხოლოდ სცენაზე, არამედ ცხოვრებაში, ვისაც ახსოვს მისი გაბრწყინებული თვალები, მისი წარმოუდგენელი სიცოცხლის სიყვარული, ოპტიმიზმი და იუმორი. ასეთი ქართველები მართლაც საუკუნეში ერთხელ იბადებიან და ეს არის დიდი დანაკარგი", _ განაცხადა სააკაშვილმა.
