ბრიუსელში ტრანსპორტის, ენერგეტიკისა და გარემოს დაცვის საკითხებზე საქართველო-ევროკავშირის თანამშრომლობის ქვეკომიტეტის მეორე სხდომა გაიმართა. სხდომას ქართული მხრიდან საქართველოს ეკონომიკისა და მდგრადი განვითარების სამინისტროს და ქვეკომიტეტის მუშაობაში ჩართული შესაბამისი სახელმწიფო უწყებების წარმომადგენლები დაესწრნენ.
სხდომის თანათავმჯდომარეები საქართველოს საგარეო საქმეთა სამინისტროს ევროინტეგრაციის დეპარტამენტის დირექტორი თეა ახვლედიანი და ევროპული საგარეო ქმედებათა სამსახურის (EEAS) აღმოსავლეთ პარტნიორობის ორმხრივი სამმართველოს უფროსი ჯონ კეარი იყვნენ.
სხდომაზე მხარეებმა საქართველოში ტრანსპორტის, ენერგეტიკისა და გარემოს დაცვის სფეროებში მიმდინარე და განხორციელებული რეფორმები შეაფასეს და საქართველო-ევროკავშირის თანამშრომლობის შემდგომი განვითარების გზებზე იმსჯელეს. ევროპელი კოლეგების მხრიდან განსაკუთრებულად აღინიშნა პროგრესი, რომელიც საქართველომ ტრანსპორტის სფეროში ბოლო ერთი წლის მანძილზე განიცადა და ამ სფეროში ჩატარებული რეფორმები დადებითად შეფასდა.
აღნიშნული ქვეკომიტეტი საქართველო-ევროკავშირის პოლიტიკური დიალოგის ერთ-ერთ ფორმატს წარმოადგენს, რომელიც ერთი წლის წინ დაარსდა. პირველი სხდომა თბილისში 2010 წლის 21 ოქტომბერს ჩატარდა.
ბრიუსელში ვიზიტის დროს საქართველოს ეკონომიკისა და მდგრადი განვითარების სამინისტროს დელეგაციამ ასევე მონაწილეობა მიიღო აღმოსავლეთ პარტიორობის ტრანსპორტის პანელის პირველ შეხვედრაში, რომელიც ევროკომისიის მიერ არის ინიცირებული, აღმოსავლეთ პარტნიორობის ქვეყნებთან ტრანსპორტის სფეროში თანამშრომლობის გაღრმავების მიზნით. შეხვედრაზე ისაუბრეს ტრანსპორტის სფეროშ თანამშრომლობის ახლებურ მიდგომებზე, ინფრასტრუქტურის გაუმჯობესების პრიორიტეტებზე და პანელის მუშაობის სამომავლო გეგმებზე.
