ბიძინა ივანიშვილი მიხეილ სააკაშვილის წინააღმდეგ სასამართლოში სარჩელს შეიტანს. როგორც ივანიშვილის პირადის ადვოკატისა ეკა ბესელიას მიერ დღეს გავრცელებულ განცხადებაშია აღნიშნული, შეტანილი იქნება სარჩელი სასამართლოში მიხეილ სააკაშვილის მიერ გამოცემული უკანონო ბრძანებულების #602 გაუქმების მოთხოვნით.
საუბარია პრეზიდენტის 11 ოქტომბრით დათარიღებულ ბრძანებულებაზე, რომლის თანახმად ბიძინა ივანიშვილსა და მის მეუღლეს ეკატერინე ხვედელიძეს საქართველოს მოქალაქეობა შუწყდათ.
"მოქალაქეობის ჩამორთმევის თაობაზე ბრძანებულება მიღებულია კანონის უხეში დარღვევით, კერძოდ დარღვეულია როგორც ორგანული კანონი საქართველოს მოქალაქეობის შესახებ, ასევე ადმინისტრაციული აქტის გამოცემის პროცედურა, რაც ცალკე სასამართლო განხილვის თემაა", - ნათქვამია განცხადებაში.
ბესელიას განცხადებით, ბიძინა ივანიშვილისთვის მოქალაქეობის შეწყვეტის თაობაზე ფორმალურ საფუძვლად ხელისუფლებამ გამოიყენა მის მიერ საფრანგეთის მოქალაქეობის მიღება მას შემდეგ, რაც უკვე ჰქონდა საქართველოს ორმაგი მოქალაქეობა.
"ორგანული კანონით საქართველოს მოქალაქეობის შესახებ, ასევე ადმინისტრაციული კოდექსით შესაბამისი ორგანოები ვალდებულნი იყვნენ გადაწყვეტილების მიღებამდე დალოდებოდნენ ბიძინა ივანიშვილის მიერ შესაბამისი პროცედურების გავლას საქართველოს მოქალაქეობის შენარჩუნებისთვის საფრანგეთის და რუსეთის მოქალაქეობის პასპორტის ჩაბარებას, ასევე ვალდებულნი იყვნენ ადმინისტრაციული აქტის გამოცემამდე საკუთარი პოზიციის და უფლებების დაცვის შესაძლებლობა მიცემოდა თავად ბიძინა ივანიშვილს. პროცედურების დაცვის დარღვევით გამოტანილი ადმინისტრაციული აქტი კი იწვევს მის ბათილობას", - ნათქვამია განცხადებაში.
რაც შეეხება ეკატერინე ხვედელიძის შემთხვევას, ბესელია აღნიშნავს, რომ ეკატერინე ხვედელიძემ საქართველოს მოქალაქეობა მიიღო 2004წლის 22 ივლისს, მაშინ როდესაც ის უკვე იყო საფრანგეთის და რუსეთის მოქალაქე.
"საფრანგეთის მოქალაქის პასპორტით ეკატერინე ხვედელიძემ რამდენჯერმე გადაკვეთა საქართველოს საზღვარი და ეს დადასტურებულია შესაბამისი ორგანოების მიერ. ეს კი იმას ნიშნავს, რომ ფორმალური საფუძველიც კი არ არსებობდა ეკატერინე ხვედელიძისთვის საქართველოს მოქალაქეობის შეწყვეტისთვის. საქმე გვაქვს არა სამართლებრივ პროცედურასთან, არამედ მიხეილ სააკაშვილის მხრიდან ბიძინა ივანიშვილისადმი, როგორც პოლიტიკური ოპონენტისადმი შიშის გამო დაუშვებელი და უკანონო მეთოდების გამოყენებასთან, საპრეზიდენტო უფლებამოსილების ბოროტად გამოყენებასთან", - ნათქვამია განცხადებაში.
