პარლამენტმა რიგგარეშე სესიის პლენარულ სხდომაზე, პირველი მოსმენით, დაჩქარებული წესით განიხილა და 81 ხმით მხარი დაუჭირა „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ კანონში ცვლილებას.
მომხსენებლის, იურიდიულ საკითხთა კომიტეტის თავმჯდომარის პირველი მოადგილის თორნიკე ჭეიშვილის განცხადებით, კანონპროექტით განისაზღვრება არალეგალური მიგრაციის გამოვლენის მიზნით საცხოვრებელი ან სამუშაო ადგილის ან სხვა კერძო საკუთრების/მფლობელობის შემოწმების წესი.
„კანონს ემატება მუხლი, რომლის თანახმად, საქართველოში კანონიერი საფუძვლის გარეშე მყოფი უცხოელის გამოვლენის ან/და უცხოელის საცხოვრებელი ადგილის გადამოწმების ან უცხოელის სამგზავრო დოკუმენტის მოძიების მიზნით, შინაგან საქმეთა სამინისტროს უფლებამოსილ ორგანოს შესაძლებლობა ექნება შეამოწმოს უცხოელის საცხოვრებელი ან სამუშაო ადგილი ან შევიდეს სხვაგვარ კერძო საკუთრებაში თუ მფლობელობაში რაიონული ან საქალაქო სასამართლოს მოსამართლის შესაბამისი ბრძანების საფუძველზე“, - განაცხადა თორნიკე ჭეიშვილმა.
მისივე თქმით, იმ შემთხვევაში, თუ იარსებებს გადაუდებელი აუცილებლობა და დაყოვნებამ შეიძლება გამოიწვიოს უცხოელის მიმალვა ან უცხოელის სამგზავრო დოკუმენტის განადგურება ან გადამალვა, ამ შემთხვევაში უკვე შინაგან საქმეთა სამინისტროს უფლებამოსილ ორგანოს უფლება ექნება, დაუყოვნებლივ დაიწყოს შესაბამისი საცხოვრებელი ან სამუშაო ადგილის, სხვა კერძო საკუთრების, მფლობელობის შემოწმება და 24 საათის განმავლობაში შესაბამისი შუამდგომლობით მიმართოს ამის თაობაზე მოსამართლეს.
ასევე, უცხოელის საცხოვრებელი ან/და სამუშაო ადგილის შემოწმების დროს პოლიცია უფლებამოსილი იქნება განახორციელოს პირის გამოკითხვა, იდენტიფიცირება, ზედაპირული შემოწმება, დათვალიერება და აგრეთვე საქართველოს კანონმდებლობით გათვალისწინებულ შემთხვევებში სხვა პრევენციული თუ იძულების ღონისძიებები მიიღოს.
