დიდი ბრიტანეთის თავდაცვის მინისტრი უეს სტრიტინგი კიევში ჩავიდა, სადაც უკრაინის პრეზიდენტ ვოლოდიმირ ზელენსკის შეხვდა. მხარეებმა უკრაინის თავდაცვის საჭიროებები და, პირველ რიგში, საჰაერო თავდაცვის გაძლიერების საკითხი განიხილეს.
ამის შესახებ ზელენსკიმ სოციალურ ქსელ X-ზე დაწერა.
უკრაინის პრეზიდენტის განცხადებით, საუბრის მთავარი თემა ენერგეტიკული ინფრასტრუქტურის, წყალმომარაგებისა და ლოგისტიკის დაცვა იყო. ზელენსკის თქმით, უკრაინას განსაკუთრებით სჭირდება ანტიბალისტიკური სისტემები.
„დიდ ბრიტანეთს საკუთარი წარმოების Patriot-ის ტიპის რაკეტები არ აქვს, თუმცა მას მტკიცე კავშირები აქვს ევროპასა და მსოფლიოში, რაც საჭირო ანტიბალისტიკური შეიარაღების მოძიებაში დაგვეხმარება. ასევე ვისაუბრეთ ერთობლივ წარმოებასა და შორ მანძილზე მოქმედ შესაძლებლობებზე. ერთად შეგვიძლია მნიშვნელოვნად გავაძლიეროთ უკრაინის სარაკეტო პროგრამა“, - განაცხადა ზელენსკიმ.
შეხვედრაზე ასევე განიხილეს რუსეთის მიერ ევროპის წინააღმდეგ ესკალაცია, მათ შორის პოლონეთის საჰაერო სივრცის დარღვევა რუსული რაკეტით იმ დროს, როდესაც ქვეყანაში „მსურველთა კოალიციის“ სამხედრო წვრთნები მიმდინარეობდა.
ზელენსკის განცხადებით, რუსეთის ასეთ ქმედებებს ევროპის მხრიდან გადამწყვეტი პასუხი სჭირდება.
უკრაინის პრეზიდენტმა დიდ ბრიტანეთს უკვე გაწეული დახმარებისთვისაც მადლობა გადაუხადა და აღნიშნა, რომ ლონდონმა უკრაინისთვის თავდაცვითი და ჰუმანიტარული დახმარების ახალი პაკეტები გამოყო, რომელთა საერთო ღირებულება 500 მილიონ ფუნტ სტერლინგს აღემატება.
შეგახსენებთ, რომ დიდი ბრიტანეთის პრემიერ-მინისტრმა ენდი ბერნემმა უკრაინისთვის 260 მილიონი ფუნტი სტერლინგის ღირებულების ახალი დახმარების პაკეტის გამოყოფის შესახებ განაცხადა. პაკეტი მოიცავს შორ მანძილზე მოქმედ დრონებს, რომლებსაც 1000 კილომეტრზე მეტი მანძილის დაფარვა შეუძლიათ.
გარდა ამისა, დიდი ბრიტანეთი და ნორვეგია უკრაინისთვის ორი თანამედროვე საბრძოლო კატარღის მშენებლობას დააფინანსებენ.