ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა განაცხადა, რომ რუსეთის მიერ უკრაინელი ბავშვების დეპორტაციის ორგანიზებული კამპანიის შესახებ შეგროვებული მტკიცებულებები მიუთითებს, რომ ეს კაცობრიობის წინააღმდეგ ჩადენილი დანაშაულია.
ევროპარლამენტის პლენარულ სხდომაზე, ოთხშაბათს, ბრიუსელში გამოსვლისას კალასმა განაცხადა, რომ დროებით ოკუპირებული ტერიტორიებიდან უკრაინელი ბავშვების რუსეთში დეპორტაციის გადაწყვეტილება პირადად ვლადიმირ პუტინმა დაამტკიცა.
„უკანონოდ დეპორტირებულია 20 500-ზე მეტი ბავშვი. მიმდინარე წელს ეუთო-მ გამოაქვეყნა ანგარიში, რომელშიც დეტალურად არის აღწერილი დროებით ოკუპირებულ ტერიტორიებზე სახელმწიფოს მიერ ორგანიზებული კამპანია, რომლის მიზანიც ბავშვებში, ადრეული ასაკიდანვე, უკრაინული იდენტობის განადგურებაა. ყველა მტკიცებულება კაცობრიობის წინააღმდეგ ჩადენილ დანაშაულზე მიუთითებს“, - განაცხადა მან.
კალასის თქმით, ამჟამად ვითარება „შემზარავ და დამახინჯებულ სახეს იღებს“.
„დიდი ალბათობით, რუსეთი გატაცებულ უკრაინელ ბავშვებს ახლა უკრაინის წინააღმდეგ საბრძოლველად აგზავნის“, - აღნიშნა ევროკავშირის უმაღლესმა წარმომადგენელმა.
მან განაცხადა, რომ ევროკავშირმა ამ დანაშაულზე პასუხისმგებელი პირებისა და ორგანიზაციების წინააღმდეგ სანქციები დააწესა. მისი თქმით, სანქცირებულთა სია ცოტა ხნის წინ გაფართოვდა და მასში დამატებით ბავშვთა ბანაკებიც შეიყვანეს, მათ შორის ჩრდილოეთ კორეაში მდებარე საერთაშორისო ბავშვთა ბანაკი „სონდო-1“, სადაც უკრაინელი ბავშვები აღმოაჩინეს.
„რუსეთი ბავშვებს იტაცებს, ჩრდილოეთ კორეა კი მათ იდეოლოგიურ დამუშავებას ახორციელებს. ასე ინაწილებენ დიქტატურები „მოვალეობებს“, - აღნიშნა კალასმა.
კალასის განცხადებით, დიპლომატიური ძალისხმევის შედეგად მსოფლიო ამ ბავშვებს ყურადღებას არ აკლებს.
„2025 წლის დეკემბერში ევროკავშირი გაერო-ს გენერალური ასამბლეის რეზოლუციის თანაავტორი იყო. რეზოლუცია გაერო-ს გენერალურ მდივანს მოუწოდებდა, უშუალოდ ჩართულიყო რუსეთთან ურთიერთობაში, რათა დაედგინა ბავშვების ადგილსამყოფელი, შეეფასებინა მათი ჯანმრთელობის მდგომარეობა და სამართლებრივი სტატუსი და უზრუნველეყო მათი დაბრუნება. ახლა ამ მიმართულებით კონკრეტულ შემდგომ ნაბიჯებს ველოდებით“, - განაცხადა კალასმა.
მისივე თქმით, საერთაშორისო ძალისხმევას შედეგი მოაქვს და მიმდინარე თვის მონაცემებით, უკრაინაში 2 719 ბავშვია დაბრუნებული, მათ შორის 13 ბავშვი და მოზარდი - გასულ კვირას.
„პატივცემულო დეპუტატებო, რუსეთის უკანონო აგრესიული ომის მოლაპარაკებების გზით დასრულებამ არა მხოლოდ უნდა შეამციროს ის საფრთხეები, რომლებსაც რუსეთი ევროპის კონტინენტს უქმნის, არამედ უზრუნველყოს თითოეული უკრაინელი ბავშვის მშობლებთან დაბრუნებაც. თუ ამის მიღწევა ვერ მოხერხდება, ეს კაცობრიობის სინდისზე სამუდამო შავ ლაქად დარჩება“, - განაცხადა კალასმა.
