აშშ-ის სახელმწიფო მდივანმა მარკო რუბიომ "დიდი შვიდეულის" ქვეყნებს განუცხადა, რომ აშშ-ის ეკონომიკური სანქციები და საზღვაო ბლოკადა იმდენად ეფექტიანად მოქმედებს, რომ პრეზიდენტ დონალდ ტრამპს ირანში მასშტაბური სამხედრო ოპერაციების ჩატარების აუცილებლობა აღარ აქვს.
ამის შესახებ რუბიომ 10 ნოემბერს პარიზში ჟურნალისტებთან საუბრისას განაცხადა. ინფორმაციას Reuters ავრცელებს.
სახელმწიფო მდივნის თქმით, ირანზე ეკონომიკური ზეწოლა ყოველდღიურად ძლიერდება. მან ხაზგასმით აღნიშნა, რომ ირანში მასშტაბური სამხედრო ოპერაციების ჩატარების საჭიროება არ არსებობს.
„ეკონომიკური ზეწოლა, რომელსაც ამჟამად ირანზე ახორციელებენ, უპრეცედენტოა და მხოლოდ ძლიერდება. ის ყოველდღიურად იზრდება“, - განაცხადა რუბიომ.
მისი თქმით, ტრამპმა ახლო აღმოსავლეთში რეგიონული მოკავშირეებისგანაც მიიღო ინფორმაცია, რომელიც ამ შეფასებას ადასტურებს.
შეგახსენებთ, რომ მანამდე აშშ-ის პრეზიდენტმა განაცხადა, რომ ამ ეტაპზე ირანზე ახალი სამხედრო დარტყმებისგან თავის შეკავებას გეგმავს. მისი თქმით, გადაწყვეტილება რეგიონის ქვეყნების, მათ შორის კატარის პრემიერ-მინისტრის თხოვნას უკავშირდება, რომელიც მას თეთრ სახლში გამართული მოლაპარაკებების დროს მიმართა.
მანამდე ტრამპმა განაცხადა, რომ 6 ნოემბერს, პარასკევს, აშშ-ის შეიარაღებულმა ძალებმა ირანზე ახალი, შეზღუდული დარტყმები განახორციელეს. სამიზნე ირანის საჰაერო თავდაცვის სისტემა იყო.
მედიის ინფორმაციით, აშშ და ირანი ომის დასრულების შესახებ მოლაპარაკებებში შესაძლო გარღვევას უახლოვდებიან. ამის ერთ-ერთ ნიშნად თეირანის მზაობა სახელდება, განიხილოს ბირთვულ პროგრამასთან დაკავშირებული საკითხები, რომელთა განხილვაზეც მანამდე უარს ამბობდა.
