7 ნოემბრის ღამეს რუსეთის მიერ განხორციელებული კომბინირებული შეტევის დროს რუსულმა ძალებმა 36 ბალისტიკური რაკეტა გამოიყენეს, რომელთა სამიზნეც კიევი და კიევის ოლქი იყო. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
მისი თქმით, რუსეთი სამმხრივი მოლაპარაკებებისთვის უკრაინის კრიტიკულ ინფრასტრუქტურაზე ბალისტიკური დარტყმებით ემზადება.
„დარტყმის მთავარი სამიზნე კვლავ ენერგეტიკული ინფრასტრუქტურა იყო. დედაქალაქში ელექტროენერგიის, წყლისა და გათბობის მიწოდების მხრივ რთული ვითარებაა. დაზიანებულია საცხოვრებელი სახლები, ჩრდილოეთის ხიდი, ნაწილობრივ კი დანგრეულია საბავშვო ბაღი“, - აღნიშნა უკრაინის პრეზიდენტმა.
მისი თქმით, კიევის ოლქში დარტყმები მიიტანეს ქვესადგურებზე, რომლებიც რივნესა და ხმელნიცკის ატომურ ელექტროსადგურებს კიევთან და უკრაინის ცენტრალურ რეგიონებთან აკავშირებს.
„ქვესადგურები დაზიანდა ასევე ვინიცის, ჟიტომირის, რივნეს, ხარკივისა და დნიპროპეტროვსკის ოლქებში. კიევის გარდა, დარტყმები კიდევ 12 რეგიონზე განხორციელდა. დაშავდა ცხრა ადამიანი, მათ შორის ერთი ბავშვი“, - განაცხადა ზელენსკიმ.
პარტნიორების, განსაკუთრებით კი აშშ-ისადმი მიმართვისას, მან ხაზგასმით აღნიშნა, რომ როდესაც რუსეთი კიევისა და მთელი ქვეყნის ელექტროენერგიის გარეშე დატოვებას ცდილობს, „უკრაინა მარტო არ უნდა დარჩეს“.
„ვიმედოვნებთ, რომ ამერიკის მხრიდან ორმხრივი მხარდაჭერა გაძლიერდება. ვიმედოვნებთ, რომ აშშ-ის კონგრესი უკრაინის საკითხს მეტ ყურადღებას დაუთმობს. რუსეთი მუდმივად ზრდის დარტყმების რაოდენობას. მნიშვნელოვანია, რომ უკრაინის მხარდაჭერა ამერიკის პოლიტიკის პრიორიტეტებს შორის დარჩეს“, - განაცხადა პრეზიდენტმა.
