ნებისმიერი ქვეყანა ან ძალა, რომელიც აშშ-ს ჩვენს წინააღმდეგ აგრესიაში დაეხმარება, შესაძლოა, ჩვენი ლეგიტიმური სამიზნე გახდეს, - ამის შესახებ „ისლამური რევოლუციის გუშაგთა კორპუსის“ (IRGC) საჰაერო-კოსმოსური ძალების მეთაურის მრჩეველმა, ბრიგადის გენერალმა ალი ბალალიმ განაცხადა.
ირანული სააგენტო Tasnim-ის ინფორმაციით, ბალალიმ აღნიშნა, რომ ირანის შესაძლო საპასუხო მოქმედებები გეოგრაფიული საზღვრებით შეზღუდული არ იქნება და ქვეყნის სარაკეტო ბაზებს ისრაელისა და რეგიონში განლაგებული აშშ-ის სამხედრო ბაზების მიზანში ამოღება შეეძლებათ.
მისივე თქმით, ირანის თავდაცვითი შესაძლებლობები გარე ფაქტორებზე დამოკიდებული არ არის, რადგან ქვეყნის სარაკეტო და სხვა სამხედრო შეიარაღების წარმოება ადგილობრივად ხდება.
ბალალის განცხადებით, ირანის სარაკეტო ბაზები ქვეყნის სხვადასხვა ნაწილშია განლაგებული და მიწისქვეშა ინფრასტრუქტურით არის დაცული, რაც მათ ხანგრძლივი სამხედრო ოპერაციების გაგრძელების შესაძლებლობას აძლევს. მან ასევე განაცხადა, რომ ირანის შეიარაღებას ისრაელის ტერიტორიაზე და რეგიონში არსებულ ამერიკულ სამხედრო ობიექტებზე დარტყმა შეუძლია.
ბალალიმ ეს განცხადება ირანის უზენაესი ლიდერის, მოჯთაბა ხამენეის მითითების შემდეგ გააკეთა. ხამენეიმ სამხედრო მეთაურებს დაავალა, მტრის ნებისმიერი სახის საფრთხისთვის გეოგრაფიული შეზღუდვების გარეშე ეპასუხათ.
ამასთან, IRGC-ის მეთაურის მრჩეველმა ჰამიდ რეზა მოყადამფარმა ცალკე განცხადებაში გააფრთხილა არაბთა გაერთიანებული საამიროები და ბაჰრეინი, რომ თუ ისინი ირანზე თავდასხმისთვის საკუთარ სამხედრო ბაზებს აშშ-ს დაუთმობენ, ირანის პასუხი მხოლოდ იმ ბაზებზე დარტყმით არ შემოიფარგლება.
