უკრაინის პრეზიდენტმა ვოლოდიმირ ზელენსკიმ განაცხადა, რომ მზად არის, დათანხმდეს სამშვიდობო შეთანხმებას, რომელიც ომის ამჟამინდელი ფრონტის ხაზზე გაყინვას ითვალისწინებს. თუმცა, მისი თქმით, უკრაინა არ დათანხმდება იმის აღიარებას, რომ „დროებით ოკუპირებული ტერიტორია რუსეთის ნაწილი გახდა“.
ამის შესახებ ზელენსკიმ ABC News-თან ინტერვიუში ისაუბრა.
„დიახ, მზად ვართ, ეს ომი რაც შეიძლება მალე შევაჩეროთ. კონფლიქტი ახლავე, ფრონტის ხაზზე გავყინოთ“, - განაცხადა ზელენსკიმ.
კითხვაზე, დათანხმდებოდა თუ არა შეთანხმების მისაღწევად უკრაინის ტერიტორიის 25%-ის დათმობას, ზელენსკიმ უარყოფითი პასუხი გასცა და განმარტა, რომ რუსეთის კონტროლქვეშ უკრაინის ტერიტორიის უფრო მცირე ნაწილია.
„როდესაც ვინმე 25%-ზე საუბრობს, ეს ნიშნავს, რომ დონბასის მთლიანად დათმობა მოგვიწევს. ეს იმას ნიშნავს, რომ ისინი [რუსები] ტერიტორიის 25%-ს გააკონტროლებენ. ამჟამად კი ისინი 19,3%-ს აკონტროლებენ“, - განაცხადა უკრაინის პრეზიდენტმა.
ამასთან, ზელენსკიმ აღნიშნა, რომ უკრაინა არ დათანხმდება დროებით ოკუპირებული ტერიტორიების რუსეთის ნაწილად აღიარებას, მიუხედავად იმისა, რომ ასეთი წინადადებები უკვე მოისმინა.
„ასეთი წინადადებები მოვისმინე, ჩვენ არ დავთანხმდებით დროებით ოკუპირებული ტერიტორიის რუსეთის ნაწილად აღიარებას“, - განაცხადა უკრაინის პრეზიდენტმა.
ინტერვიუში ზელენსკიმ ასევე გაიმეორა, რომ Starlink-ის გამოყენებაზე დაწესებული შეზღუდვები კვლავ მოქმედებს.
გარდა ამისა, უკრაინის პრეზიდენტის თქმით, ბოლო 90 დღის განმავლობაში უკრაინამ სტრატეგიული პარტნიორისგან Patriot-ის 24 რაკეტა მიიღო.
