აშშ-ში, ჯორჯიის შტატში, ატლანტის მახლობლად მდებარე გასართობ პარკში Six Flags Over Georgia ატრაქციონზე მომხდარი ინციდენტის შედეგად ერთი ადამიანი დაიღუპა, რამდენიმე კი დაშავდა.
CBS News-ის ინფორმაციით, ინციდენტი 12 ოქტომბერს მოხდა. პოლიციამ დაადასტურა, რომ რამდენიმე ადამიანი დაშავდა, ერთი კი დაიღუპა. მომხდარის ზუსტი გარემოებები ამ დროისთვის უცნობია.
შემთხვევის შემდეგ პარკში ატრაქციონის მუშაობა შეჩერდა. ადგილობრივი ტელევიზიების მიერ გავრცელებულ კადრებში ჩანს, როგორ გამოჰყავთ მგზავრები ატრაქციონიდან საგანგებო კიბის გამოყენებით. ოფიციალურ პირებს არ დაუკონკრეტებიათ, უშუალოდ რომელი ატრაქციონი მონაწილეობდა ინციდენტში.
პარკის მმართველი კომპანიის, Six Flags-ის წარმომადგენლის განცხადებით, თანამშრომლებმა და ადგილობრივმა სამსახურებმა შემთხვევაზე დაუყოვნებლივ მოახდინეს რეაგირება. კომპანია გამოძიებასთან სრულად თანამშრომლობს და დაზარალებულებსა და თანამშრომლებს მხარდაჭერას უწევს.
Associated Press-ის ცნობით, ინციდენტის შემდეგ კომპანიამ უსაფრთხოების მიზნით ექვს გასართობ პარკში ცხრა ატრაქციონის მუშაობა დროებით შეაჩერა. შეზღუდვა იმ ატრაქციონებს შეეხო, რომლებიც ჯორჯიის პარკში მომხდარ შემთხვევასთან დაკავშირებული ატრაქციონის მსგავსია.
გამოძიება გრძელდება.
