ღამით, შავ ზღვაში, ბულგარეთის სანაპიროსთან, ორ სავაჭრო გემზე დრონებით თავდასხმები განხორციელდა. ერთი გემი ჩაიძირა. ბულგარეთის პრემიერ-მინისტრმა რუმენ რადევმა განაცხადა, რომ განმარტებებისთვის რუსეთის ელჩის დაბარებას აპირებს, თუმცა თავდასხმებში გამოყენებული დრონების წარმომავლობა ჯერჯერობით დადგენილი არ არის.
ინფორმაცია უსაფრთხოების საბჭოს რიგგარეშე სხდომაზე წარადგინეს.
მალტის დროშის ქვეშ მცურავ სატვირთო გემ CHELSEA 3-ს ბიალას აღმოსავლეთით, დაახლოებით 18 საზღვაო მილის დაშორებით, სამი საჰაერო დრონი დაესხა თავს. დრონები გემის გემბანსა და ბორტს მოხვდა.
ეკიპაჟის 15-ვე წევრის ევაკუაცია განხორციელდა და ისინი ვარნაში გადაიყვანეს. წინასწარი ინფორმაციით, ხუთ მეზღვაურს მსუბუქი დაზიანებების გამო სამედიცინო დახმარება დასჭირდა.
გემი CHELSEA 3 მალტის დროშით დაცურავს, ოდესაშია რეგისტრირებული და წარმოდგენილი ინფორმაციის თანახმად, უკრაინას ეკუთვნის.
მეორე გემი კრაპეცის აღმოსავლეთით, დაახლოებით 17 საზღვაო მილის დაშორებით ჩაიძირა. ამ დროისთვის ეკიპაჟის მხოლოდ ერთი გადარჩენილი წევრის შესახებ არის ინფორმაცია.
ბულგარეთის პრემიერ-მინისტრი რუსეთის ელჩთან საუბრის გარდა, საკითხს ნატო-ს გენერალურ მდივანთანაც განიხილავს.
