აშშ-ის ცენტრალური სარდლობის (CENTCOM) განცხადებით, ამერიკელმა სამხედროებმა ომანის ყურეში კომერციული სატვირთო გემი მწყობრიდან გამოიყვანეს. სარდლობის ცნობით, გემის ეკიპაჟმა არაერთი გაფრთხილება უგულებელყო და ირანის წინააღმდეგ მოქმედი საზღვაო ბლოკადის გარღვევა სცადა.
CENTCOM-ის ცნობით, ამერიკულმა სამხედრო თვითმფრინავმა ზუსტი დამიზნების საბრძოლო მასალით პანამის დროშის ქვეშ მცურავი გემის, M/V Ocean Molica-ს (ასევე ცნობილი როგორც Arika Sun), უკანა ნაწილს დაარტყა. დარტყმის შედეგად გემის ძრავის სისტემა სრულად გამოვიდა მწყობრიდან, თუმცა ეკიპაჟის წევრები არ დაშავებულან.
სარდლობის ინფორმაციით, დიდი სატვირთო გემი რეგიონულ წყლებში გადაადგილებას ირანის ერთ-ერთი პორტიდან გასვლის შემდეგ ცდილობდა.
CENTCOM-მა ომანის ყურესა და ჰორმუზის სრუტის მისადგომებთან მცურავ გემებს მოუწოდა, გაითვალისწინონ სამხედროების გაფრთხილებები და საჭიროების შემთხვევაში აშშ-ის საზღვაო ძალებს დაუკავშირდნენ.
