ლიეტუვა პოლონეთთან ერთად მოსახლეობის საერთაშორისო ევაკუაციის გეგმას ამუშავებს, რომელიც სამხედრო ან სხვა მასშტაბური კრიზისის შემთხვევაში მოქალაქეების უსაფრთხო გადაადგილებას ითვალისწინებს. ამის შესახებ ლიეტუვის ეროვნული კრიზისების მართვის ცენტრის დირექტორმა, ვილმანტას ვიტკაუსკასმა განაცხადა
გეგმის ფარგლებში განიხილება ლიეტუვიდან მოსახლეობის, მათ შორის საჭიროების შემთხვევაში ლატვიისა და ესტონეთის მოქალაქეების, პოლონეთის გავლით ევაკუაცია, ასევე ტრანსპორტირების, საზღვრის გადაკვეთისა და ევაკუირებულთა მიღების საკითხები.
პოლონეთის მიმართულება განსაკუთრებით მნიშვნელოვანია, რადგან ვილნიუსიდან ერთ-ერთი ძირითადი საევაკუაციო მარშრუტი პოლონეთის საზღვრისკენ მიემართება. პოლონეთის პოდლასკის სავოევოდო ამ რეგიონს ბალტიის ქვეყნების მოსახლეობისთვის შესაძლო სატრანზიტო დერეფნის ფუნქციის შესასრულებლად ამზადებს.
ლიეტუვისა და პოლონეთის წარმომადგენლები ასევე განიხილავენ საზღვრისპირა ევაკუაციის მარშრუტებს, სატრანსპორტო შესაძლებლობებს, ევაკუირებულთა მიღებასა და განთავსებას და საზღვრის გადაკვეთის კოორდინაციას.
პოლონეთის თავდაცვის მინისტრმა ვლადისლავ კოსინიაკ-კამიშმა განაცხადა, რომ საჭიროების შემთხვევაში პოლეთი ლიეტუვას მოსახლეობის ევაკუაციაში დაეხმარება.
ლიეტუვის ხელისუფლებამ ივლისში სახელმწიფო დონის ევაკუაციის გეგმაც დაამტკიცა, რომლის მიხედვითაც მოსახლეობის გადაადგილება სამხედრო და სამოქალაქო საფრთხეების შემთხვევაში იქნება ორგანიზებული.
