გერმანიის კანცლერმა ფრიდრიხ მერცმა 6 სექტემბერს საქსონია-ანჰალტის რეგიონულ არჩევნებში მისი პარტიის შედეგი ბოლო ათწლეულების განმავლობაში ქრისტიან-დემოკრატიული კავშირისთვის (CDU) ყველაზე მძიმე მარცხად შეაფასა და განაცხადა, რომ რეფორმების კურსის გაგრძელებას აპირებს.
მერცმა არჩევნების შედეგებზე გამართულ პრესკონფერენციაზე განაცხადა, რომ მარცხს შედეგები აუცილებლად უნდა მოჰყვეს, თუმცა არ დაუკონკრეტებია, კონკრეტულად რა ცვლილებებს გულისხმობდა.
„ეს ბოლო წლების, შესაძლოა, ბოლო ათწლეულების განმავლობაში CDU-სთვის ყველაზე მძიმე მარცხია. ეს ჩვენს პარტიას საფუძვლებამდე არყევს. ჩვენ უბრალოდ ძველებურად ვეღარ გავაგრძელებთ - ვერც მე და ვერც ფედერალური მთავრობა“, - განაცხადა მერცმა.
მერცის თქმით, გერმანიას რეფორმები სჭირდება და ფედერალურმა მთავრობამ მათი განხორციელება უნდა უზრუნველყოს.
„ჩემი გადაწყვეტილება, განვახორციელო რეფორმების კურსი, არ შერყეულა. ფრაზა - „ამაზე უკეთ უნდა ვიმუშაოთ“ - უკვე აღარ არის საკმარისი. ბევრი ადამიანის ცხოვრებისეული მდგომარეობა რთულია“,- განაცხადა მერცმა.
კანცლერმა ასევე აღნიშნა, რომ „აცნობიერებს საკუთარ პირად პასუხისმგებლობას“ და არსებული ვითარება მას და მის გუნდს მუშაობის გაგრძელებას ავალდებულებს.
მერცმა განაცხადა, რომ „დანებება ჩემთვის ვარიანტი არ არის“ და არჩევნების შედეგის მიუხედავად, რეფორმების კურსის გაგრძელებას აპირებს. მისი თქმით, არჩევნებმა აჩვენა, რომ პრობლემა მხოლოდ საქსონია-ანჰალტში არ არის - „რაღაც შეიცვალა არა მხოლოდ საქსონია-ანჰალტში, არამედ მთელ გერმანიაში', - თქვა მან.
მერცმა უარყო სპეკულაციები მისი შესაძლო გადადგომის შესახებ.
წინასწარი შედეგების თანახმად, საქსონია-ანჰალტში გუშინ ჩატარებულ რეგიონულ საპარლამენტო არჩევნებში ულტრამემარჯვენე პარტიამ -„ალტერნატივა გერმანიისთვის“ (AfD) - ხმების 43.8%-ით გაიმარჯვა. ქრისტიან-დემოკრატიულმა კავშირმა (CDU), რომლის წევრიც საქსონია-ანჰალტის მხარის ამჟამინდელი პრემიერ-მინისტრი სვენ შულცეა, ხმების 17.2% მიიღო,
ხუთი წლის წინ CDU-ს 37.1% ჰქონდა. ამასთან, CDU-მ არცერთი პირდაპირი მანდატი არ მოიგო, მაშინ როცა 2021 წელს 41-დან 40 ოლქში გაიმარჯვა.
Reuters-ის შეფასებით, ეს შედეგი პირდაპირ ურტყამს მერცის პოზიციებს და მთელი ევროპის მასშტაბით მემარჯვენე პოპულიზმის გაძლიერების გაფრთხილებაა. სააგენტო აღნიშნავს, რომ არჩევნებში ამომრჩეველთა უკმაყოფილება განსაკუთრებით უკავშირდებოდა ეკონომიკურ მდგომარეობას, პენსიებსა და ცხოვრების გაძვირებას.
