დიდი ბრიტანეთი უკრაინის მხარდაჭერას რუსეთის შეჭრის წინააღმდეგ „100%-ით“ გააგრძელებს. ამის შესახებ ქვეყნის პრემიერ-მინისტრმა ენდი ბერნემმა განაცხადა მას შემდეგ, რაც რუსეთმა ბრიტანეთი უკრაინაში ვითარების „განზრახ გამწვავებაში“ დაადანაშაულა, წერს Reuters.
„დიდი ბრიტანეთი აკეთებს იმას, რასაც დიდი ხნის წინ დაპირდა - 100%-ით უჭერს მხარს უკრაინას ვლადიმირ პუტინის მიერ წარმოებულ ამ უკანონო ომში“, - განუცხადა ბერნემმა ჟურნალისტებს.
მისი თქმით, ბრიტანეთის პოზიცია უკრაინის მიმართ მისი პრემიერობის დროსაც ისეთივე იქნება, როგორიც წინა პრემიერ-მინისტრების დროს იყო.
„ჩვენ მხარდაჭერას ვუწევთ უკრაინას, რათა მან საკუთარი თავის დაცვა შეძლოს, და ეს მთელი კონფლიქტის განმავლობაში, წინა პრემიერ-მინისტრების დროსაც, დიდი ბრიტანეთის პოზიცია იყო. ჩემ დროს ეს პოზიცია უცვლელი რჩება. ჩვენ მხოლოდ კარგ ამინდში არ ვართ მეგობრები. უკრაინისთვის რთულ დროს მის გვერდით ვიქნებით და ეს არ შეიცვლება“, - განაცხადა ბერნემმა.
როგორც ცოტა ხნის წინ ცნობილი გახდა, უკრაინამ რუსეთის სიღრმეში სამიზნეებზე დარტყმების განხორციელება ბრიტანული წარმოების დრონების გამოყენებით დაიწყო.
The Times-ის ინფორმაციით, მათ შორის არის რეაქტიული დრონი Nyan, რომელსაც დიდი ბრიტანეთის სამეფო ფლოტი ცდიდა, ასევე კიდევ ერთი ბრიტანული დრონი, რომლის მწარმოებლის ვინაობა უსაფრთხოების მოსაზრებებიდან გამომდინარე არ სახელდება.
გამოცემის ცნობით, ბრიტანული დრონები გამოიყენეს მოსკოვის მახლობლად, იაროსლავლსა და ვოლგოგრადში მდებარე რუსეთის ნავთობგადამამუშავებელ საწარმოებზე თავდასხმებისთვის. დრონი Nyan ასევე გამოიყენეს ბელგოროდის მახლობლად მდებარე სამიზნეებზე დარტყმისთვის.
ამ ინფორმაციის გასაჯაროების შემდეგ რუსეთმა განაცხადა, რომ უკრაინისთვის დრონების მიწოდების გამო დიდი ბრიტანეთი პასუხს აგებს. რუსეთის საელჩომ დიდ ბრიტანეთში აღნიშნა, რომ „გაერთიანებული სამეფო სისხლიანი დანაშაულებისა და ტერორისტული აქტების თანამონაწილე და ხელშემწყობი“ გახდა და გააფრთხილა, რომ „ლონდონის ქმედებებს გარდაუვლად მოჰყვება შედეგები, რომლებზეც მას პასუხისგება მოუწევს“.
