ბოლო ექვსი თვის განმავლობაში უკრაინამ რუსეთის ტერიტორიაზე შორ მანძილზე დარტყმებისთვის ბრიტანული დრონების გამოყენება დაიწყო. ამის შესახებ The Kyiv Independent-ი The Times-ზე დაყრდნობით წერს.
ასეთი დარტყმებისთვის გამოყენებულ დრონებს შორისაა BAE Systems-ის რეაქტიული Nyan-ი და კიდევ ერთი ბრიტანული უპილოტო აპარატი, რომლის დასახელებასა და მწარმოებელს უსაფრთხოების მიზეზების გამო არ ასახელებენ. გამოცემის ცნობით, Nyan-ი გამოიყენეს უკრაინის საზღვართან ახლოს მდებარე რუსეთის ქალაქ ბელგოროდზე დარტყმისთვის.
ბრიტანული დრონები ასევე გამოიყენეს მოსკოვის მახლობლად, ასევე იაროსლავლსა და ვოლგოგრადში მდებარე ნავთობგადამამუშავებელ ქარხნებზე დარტყმებისთვის. თუმცა გამოცემა არ აკონკრეტებს, კონკრეტულად რომელი ბრიტანული დრონებით განხორციელდა ამ ობიექტებზე თავდასხმები.
The Times-ის ცნობით, ინფორმაცია ბრიტანული დრონების გამოყენების შესახებ გამოცემამ უკრაინის შეიარაღებულ ძალებში საკუთარი წყაროებისგან მიიღო. ერთ-ერთი წყაროს თქმით, უკრაინა შორ მანძილზე დარტყმების უმეტესობას საკუთარი წარმოების დრონებით ახორციელებს, თუმცა ბრიტანული დრონებიც წარმატებით გამოიყენება მსგავსი ოპერაციებისთვის.
Nyan-ი განკუთვნილია მტრის აქტიური წინააღმდეგობის პირობებში შორ მანძილზე დარტყმების განსახორციელებლად. დრონი უკვე გამოცადეს როგორც ხმელეთზე, ისე ზღვაზე, მათ შორის ესტონეთში გამართულ Spring Storm-ის სწავლებებსა და ბრიტანეთის სამეფო საზღვაო ძალების ექსპერიმენტული ხომალდის, XV Patrick Blackett-ის ბორტიდან.
