16 აგვისტოს ღამით უკრაინის თავდაცვის ძალებმა რუსეთის როსტოვის ოლქში მდებარე საწარმო „კომბინატ კამენსკის“ დაარტყეს, რომელიც მყარ სარაკეტო საწვავს აწარმოებს. უკრაინის გენერალურმა შტაბმა ასევე დაადასტურა ტიუმენისა და ორენბურგის ოლქებში ნავთობქიმიურ საწარმოებზე ადრე განხორციელებული დარტყმების შედეგები.
გენშტაბის ცნობით, კამენსკ-შახტინსკში მდებარე „კომბინატ კამენსკიზე“ ღამის დარტყმის შემდეგ ხანძარი დაფიქსირდა.
გენშტაბის ინფორმაციით, საწარმო აწარმოებს მყარ სარაკეტო საწვავს „ურაგანის“, „სმერჩისა“ და „ტორნადო-ს“-ის ტიპის ზალპური ცეცხლის რეაქტიული სისტემების საბრძოლო მასალებისთვის, ასევე სხვა სარაკეტო სისტემებისა და საავიაციო საშუალებების საბრძოლო მასალებისთვის.
გარდა ამისა, უკრაინელმა სამხედროებმა განაცხადეს, რომ 10 აგვისტოს ცენტრალურ გაზის ფრაქციონირების №1 დანადგარზე განხორციელებული დარტყმის შემდეგ ტიუმენის ოლქის ქალაქ ტობოლსკში მდებარე საწარმო „ზაპსიბნეფტეხიმმა“ მუშაობა შეაჩერა. ეს რუსეთის ერთ-ერთი უმსხვილესი ნავთობქიმიური კომპლექსია.
გენერალურმა შტაბმა ასევე დაადასტურა, რომ 11 აგვისტოს დარტყმის შედეგად ორენბურგის ოლქში მდებარე „ორსკნეფტეორგსინთეზის“ ნავთობგადამამუშავებელ ქარხანაში რიგი დანადგარები დაზიანდა. მათ შორისაა ჰიდროკრეკინგის დანადგარი, ნავთობის პირველადი გადამუშავების სამი დანადგარი და მსუბუქი ნავთობფრაქციების მეორადი გამოხდის დანადგარი.
ქარხანაში აწარმოებენ ბენზინს, დიზელსა და საავიაციო საწვავს, მაზუთსა და ნავთობპროდუქტების სხვა სახეობებს, რომლებიც, გენერალური შტაბის ინფორმაციით, რუსეთის ჯარებისა და სამხედრო-სამრეწველო კომპლექსის მომარაგებისთვის გამოიყენება.
