11 აგვისტოს ღამით რუსეთის ძალებმა უკრაინაზე ხომალდსაწინააღმდეგო და ბალისტიკური რაკეტებით, ასევე სხვადასხვა ტიპის 120 დრონით იერიში მიიტანეს. უკრაინის საჰაერო თავდაცვის ძალებმა მტრის 98 დრონი ჩამოაგდეს. ამასთან, საჰაერო ძალებს გაშვებული რაკეტების საერთო რაოდენობა არ დაუკონკრეტებიათ. ინფორმაციას უკრაინული მედია უკრაინის შეიარაღებული ძალების გენშტაბზე დაყრდნობით ავრცელებს.
სამხედროების ინფორმაციით, რუსებმა ზაპოროჟიესა და კიევს ხომალდსაწინააღმდეგო რაკეტებით „ცირკონითა“ და „ისკანდერ-მ“/KN-23ის ბალისტიკური რაკეტებით შეუტიეს. რაკეტები რუსეთის კურსკის, როსტოვის, ვორონეჟისა და ორიოლის ოლქებიდან გაუშვეს.
საჰაერო ძალებს არ დაუკონკრეტებიათ, რამდენი რაკეტა გამოიყენა რუსეთმა ამ თავდასხმის დროს.
მტერმა ასევე გამოიყენა 120 დამრტყმელი უპილოტო საფრენი აპარატი, მათ შორის „შაჰედის“ ტიპის დრონები, რომელთა უმეტესობა რეაქტიული იყო, „გერბერა“ და დრონები-იმიტატორები, ე.წ. „პაროდია“.
დრონები გაუშვეს რუსეთის ქალაქების - კურსკის, მილეროვოს, ორიოლისა და პრიმორსკო-ახტარსკის რაიონებიდან, ასევე დროებით ოკუპირებული დონეცკიდან და ყირიმის გვარდეისკოედან.
რუსეთის იერიშის ძირითადი მიმართულებები კიევის ოლქი და ზაპოროჟიე იყო.
საჰაერო თავდასხმას უკრაინის თავდაცვის ძალების ავიაცია, საზენიტო-სარაკეტო ძალები, რადიოელექტრონული ბრძოლისა და უპილოტო სისტემების ქვედანაყოფები, ასევე მობილური საცეცხლე ჯგუფები იგერიებდნენ.
დაფიქსირდა მტრის საჰაერო თავდასხმის საშუალებების 21 ლოკაციაზე მოხვედრა, ასევე ჩამოგდებული დრონების ნამსხვრევების ჩამოვარდნა 5 ლოკაციაზე.
