კოლუმბიის წყნარი ოკეანის სანაპიროზე მომხდარ ძლიერ მიწისძვრას სულ მცირე 132 ადამიანი ემსხვერპლა, 87 კი დაშავდა. ამის შესახებ BBC იუწყება.
აშშ-ის გეოლოგიური სამსახურის მონაცემებით, მიწისძვრის სიმძლავრემ 7,4 მაგნიტუდა შეადგინა. ქვეყანაში საგანგებო მდგომარეობა გამოცხადდა.
მიწისძვრა ორშაბათს, ადგილობრივი დროით 07:34 საათზე (თბილისის დროით 16:34-ზე) დაიწყო. მისი ეპიცენტრი სოფელ სან-ხოსე-დელ-პალმართან მდებარეობდა, კერა კი 107 კილომეტრის სიღრმეზე იყო.
„ეროვნულმა მთავრობამ ყველა არსებული რესურსი მიმართა ადამიანების დასაცავად, დაზარალებული რეგიონების მხარდასაჭერად და დახმარების გასაწევად იქ, სადაც ეს საჭიროა“, - განაცხადა პრეზიდენტმა დე ლა ესპრიელიამ, რომელმაც ქვეყანაში ხელისუფლება ცოტა ხნის წინ, საპრეზიდენტო არჩევნების შემდეგ გადაიბარა.
მისი თქმით, მთავარი პრიორიტეტი ნანგრევებში მოყოლილი ადამიანების გადარჩენაა.
კალის მერმა ალეხანდრო ედერმა, რომელიც კოლუმბიის მოსახლეობის რაოდენობით მესამე ქალაქია, თავდაპირველად 18 დაღუპულის შესახებ განაცხადა. მისი თქმით, ქალაქში სულ მცირე 20 შენობა ჩამოინგრა. მოგვიანებით დაღუპულთა რაოდენობამ იმატა.
ჩოკოს დეპარტამენტის გუბერნატორმა ნუბია კაროლინა კორდობამ განაცხადა, რომ არიან დაშავებულები, თუმცა მათი ზუსტი რაოდენობა არ დაუკონკრეტებია. მისი თქმით, დეპარტამენტის ადმინისტრაციულ ცენტრში, ქალაქ კიბდოში, მრავალი შენობა სერიოზულად დაზიანდა და არიან დაშავებულებიც.
მეზობელი რისარალდას დეპარტამენტის გუბერნატორმა ხუან დიეგო პატინიომ ადგილობრივ რადიოსადგურ Blu Radio-ს განუცხადა, რომ დეპარტამენტის დედაქალაქ პერეირაში რამდენიმე შენობას „სერიოზული ზიანი“ მიადგა.
„რაც ახლა მოხდა, ძალიან სერიოზულია. კადრები მართლაც შოკისმომგვრელია: ადამიანები დაშავდნენ, შენობების ფასადები ჩამოინგრა“, - განაცხადა მან.
მიწისქვეშა ბიძგები ქვეყნის დედაქალაქ ბოგოტაშიც იგრძნობოდა, რომელიც მიწისძვრის ეპიცენტრიდან დაახლოებით 400 კილომეტრში მდებარეობს. ბიძგების დროს დედაქალაქში შუქნიშნები და ხეები ირყეოდა, მოსახლეობა კი სახლებიდან ქუჩაში გამოვიდა. ქალაქში რამდენიმე შენობის ევაკუაცია განხორციელდა.
მოგვიანებით ბოგოტის მერმა კარლოს გალანმა სოციალურ ქსელში განაცხადა, რომ დედაქალაქში სერიოზული დაზიანებები არ დაფიქსირებულა.
