უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინას აშშ-სთან Patriot-ის სისტემებისთვის რაკეტების ყოველთვიურად მიწოდების შესახებ შეთანხმება აქვს, თუმცა მათი რაოდენობა უკრაინის საჰაერო თავდაცვის საჭიროებებისთვის საკმარისი არ არის.
„რა მიმართულებებით შეიძლება ამ პრობლემის მოგვარება? პირველ რიგში, ვის აქვს ანტისარაკეტო სისტემები? მწარმოებელს, ანუ აშშ-ს. შეუძლიათ თუ არა მათ დახმარება? ამაზე ვმუშაობთ.
ყოველთვიურად მოგვაწვდიან თუ არა რაკეტებს? - დიახ, ჩვენ ამის შესახებ შეთანხმება გვაქვს.
საკმარისია თუ არა ეს რაკეტები? 2026 წელს, ამის შესახებ უკვე ვთქვი... 2026 წელს ეს რაკეტები კიდევ უფრო ნაკლები იქნება“.
პრეზიდენტს არ დაუკონკრეტებია, ზუსტად რამდენი რაკეტის მიწოდებაზეა საუბარი ყოველთვიურად.
ასევე გაურკვეველია, საუბარია თუ არა აშშ-სთან ახალ შეთანხმებაზე, თუ მანამდე მიღწეულ შეთანხმებაზე, რომელიც მომავალშიც გაგრძელდება.
მანამდე უკრაინასა და აშშ-ს უკვე ჰქონდათ შეთანხმება Patriot-ის სისტემებისთვის რაკეტა-ჩამჭერების მიწოდებაზე, თუმცა რეგულარული, ყოველთვიური მიწოდების გრაფიკის დეტალები საჯაროდ არ გამოქვეყნებულა.
