რუსეთის მიერ კრივი რიჰის გარეუბანში კერძო სახლზე განხორციელებული სარაკეტო დარტყმის შედეგად 6 ადამიანი დაიღუპა, რვა კი დაშავდა. დაღუპულთა შორის 2 ბავშვია.
ამის შესახებ უკრაინული მედია კრივი რიჰის თავდაცვის საბჭოს თავმჯდომარის ოლექსანდრ ვილკულის განცხადებაზე დაყრდნობით იუწყება.
„ვორონეჟიდან გაშვებული „ისკანდერ-М“-ის ტიპის ბალისტიკური რაკეტა პირდაპირ მოხვდა კერძო სახლს, სადაც მრავალშვილიანი ოჯახი ცხოვრობდა. დაიღუპნენ 5 და 12 წლის გოგონები და ოთხი ზრდასრული. კიდევ რვა ადამიანი დაშავდა, მათ შორის 6 და 15 წლის ბიჭები,“ - განაცხადა ვილკულიმ.
მისივე ინფორმაციით, ადგილზე სამაშველო ოპერაცია კვლავ გრძელდება. მაშველები ნანგრევების გაწმენდას აგრძელებენ, რის გამოც მსხვერპლის რაოდენობა შესაძლოა გაიზარდოს.
ადგილობრივი ხელისუფლების ინფორმაციით, მასშტაბური დაბომბვის შედეგად რადუშნეს დასახლებაში მცხოვრები მრავალშვილიანი ვორონოვების ოჯახი მთლიანად დაიღუპა.
