ჩრდილოეთ კორეის ლიდერი კიმ ჩენ ინი შაბათს, 24 ოქტომბერს, ჩინეთში ჩავიდა და სასაზღვრო ქალაქ დანდუნს ეწვია. ინფორმაციას Reuters ავრცელებს.
კიმ ჩენ ინმა ჩინეთში ახალი ხიდის - მდინარე იალუს (ამნოკის) გავლით გადაკვეთა, რომელიც ჩრდილოეთ კორეის ქალაქ სინუიჯუს ჩინეთის ქალაქ დანდუნთან აკავშირებს. ხიდი, რომლის მშენებლობაც 2014 წელს დასრულდა, ოფიციალურად ოქტომბერში, მრავალწლიანი შეფერხების შემდეგ გაიხსნა. ის ქვეყნებს შორის ვაჭრობის გაფართოებას შეუწყობს ხელს.
კიმ ჩენ ინი დანდუნში ჩინეთის კომუნისტური პარტიის პოლიტბიუროს მუდმივი კომიტეტის წევრსა და ქვეყნის უმაღლეს პოლიტიკურ მრჩეველს, ვან ჰუნინს შეხვდა. მათ ავტომობილების ქარხანა და კორეის ომის მემორიალი მოინახულეს, სადაც ჩინეთის დაღუპულ ჯარისკაცებს პატივი მიაგეს.
ვან ჰუნინმა კიმ ჩენ ინს ჩინეთის პრეზიდენტ სი ძინპინის მისალმებები გადასცა. შეხვედრისას ჩრდილოეთ კორეის ლიდერმა იმედი გამოთქვა, რომ ორ ქვეყანას შორის ისტორიული მეგობრობა და პრაქტიკული თანამშრომლობა კიდევ უფრო გაღრმავდება. ვიზიტის დასრულების შემდეგ კიმ ჩენ ინი სამშობლოში დაბრუნდა. ჩინეთისა და ჩრდილოეთ კორეის ოფიციალურ ცნობებში სი ძინპინთან მისი შეხვედრა ნახსენები არ ყოფილა.
ვიზიტი ჩინეთის ჯარების კორეის ომში ჩართვის წლისთავის აღნიშვნამდე ერთი დღით ადრე გაიმართა. ჩინეთი ჩრდილოეთ კორეის უმთავრესი სავაჭრო პარტნიორი და მისი მნიშვნელოვანი ეკონომიკური და დიპლომატიური მხარდამჭერია. ვიზიტი ასევე მოჰყვა ქვეყნებს შორის ახალი ხიდის გახსნას, რომელიც ორმხრივი ვაჭრობის ზრდას შეუწყობს ხელს.
