პოლონეთის საგარეო საქმეთა მინისტრმა რადოსლავ სიკორსკიმ, უკრაინაში მიმდინარე ომზე საუბრისას, განაცხადა, რომ ინიციატივას რუსეთი აღარ ფლობს.
ამის შესახებ მან CBS News-თან ინტერვიუში ისაუბრა,.
სიკორსკის თქმით, უკრაინის წარმატებულმა წინააღმდეგობამ, რომელიც, ზოგიერთი ანალიტიკოსის შეფასებით, წელს ომის მიმდინარეობას კიევის სასარგებლოდაც კი ცვლის, რუსეთს აღმოსავლეთ ფლანგზე NATO-ის წინააღმდეგ ეფექტიანი შეჭრისთვის საჭირო რესურსები გამოაცალა.
„უკრაინამ უდავოდ მოიპოვა უპირატესობა შავ ზღვაზე. რუსეთს აშკარად არ აქვს საჰაერო უპირატესობა უკრაინასთან. მას შეუძლია რაკეტებისა და უპილოტო საფრენი აპარატების გაშვება, მაგრამ უკრაინის ცაში თავისუფლად მოქმედება არ შეუძლია. სახმელეთო საბრძოლო მოქმედებები ჩიხშია შესული და, როგორც ჩანს, უკრაინამ საცეცხლე კონტროლი დაამყარა სტრატეგიულ ავტომაგისტრალზე, რომელიც დონბასს ყირიმთან აკავშირებს“, - განაცხადა მან.
მინისტრის თქმით, ომები, როგორც წესი, ხაზოვნად არ ვითარდება და სხვადასხვა ეტაპს გადის.
„როგორც ჩანს, ის ეტაპი, როდესაც ინიციატივა რუსეთს ეკუთვნოდა, დასრულდა“, - აღნიშნა სიკორსკიმ.
