ბუდაპეშტში ვიქტორ ორბანის საარჩევნო კამპანიის ფარგლებში მხარდამჭერებთან შეხვედრის დროს, რომელსაც აშშ-ის ვიცე-პრეზიდენტი ჯეი დი ვენსი ესწრებოდა, აშშ-ის პრეზიდენტმა, დონალდ ტრამპმა უნგრეთის პრემიერ-მინისტრს სატელეფონო ჩართვის საშუალებით გამოუცხადა მხარდაჭერა.
აშშ-ის ვიცე-პრეზიდენტმა ჯეი დი ვენსმა ტრამპს დაურეკა მას შემდეგ, რაც უნგრეთის პრემიერ-მინისტრი მას „ფიდესის“ მიტინგის დროს სცენაზე მიიწვია.
ჯეი დი ვენსმა დონალდ ტრამპს დაურეკა და მისი განცხადება ორბანის მხარდამჭერებს მოასმენინა.
„მე ვიქტორის დიდი გულშემატკივარი ვარ, სრულად ვუჭერ მხარს მას, შეერთებული შტატები სრულად უჭერს მხარს მას“, - თქვა ტრამპმა და უნგრეთის პრემიერ-მინისტრი შეაქო.
ტრამპმა განაცხადა, რომ ორბანმა არ მისცა სცვებს უფლება, შტურმით ქვეყანაში შეჭრილიყვნენ, როგორც ეს სხვებმა გააკეთეს.
„მიყვარს უნგრეთი და მიყვარს ვიქტორი, შემიძლია, გითხრათ, რომ ის შესანიშნავი ადამიანია და ჩვენ შესანიშნავი ურთიერთობა გვქონდა. ის თავის საქმეს აკეთებს. გახსოვდეთ, მან არ მისცა უფლება, რომ თქვენი ქვეყანა შტურმით აეღოთ, თქვენს ქვეყანაში შემოჭრილიყვნენ, როგორც ეს სხვებმა გააკეთეს და, გულწრფელად რომ ვთქვათ, თავიანთი ქვეყნები გაანადგურეს. მან თქვენი ქვეყანა კარგ მდგომარეობაში შეინარჩუნა, უნგრელი ხალხი ქვეყანაში დატოვა და შესანიშნავი საქმე გააკეთა. მინდა, გითხრათ, რომ ის ძალიან მომწონს. რომ არ ვფიქრობდე, კარგად მუშაობს, ასეთ ზარს არ განვახორციელებდი. როგორც ჩანს, დიდი შეკრებაა და ეს ისეთი ხალხია, როგორიც მე მომწონს“, – აღნიშნა აშშ-ის პრეზიდენტმა.
