მინდა, მკაფიოდ ვთქვა – არ უნდა დავღვაროთ ცრემლები ირანის რეჟიმისთვის. ამ რეჟიმს მოჰქონდა სიკვდილი და რეპრესიები თავისი ხალხისთვის, – ამის შესახებ ევროკომისიის პრეზიდენტმა, ურსულა ფონ დერ ლაიენმა ბრიუსელში, ევროკავშირის წევრი ქვეყნების ელჩების შეკრებაზე განაცხადა.
„ევროპამ ყურადღება უნდა გაამახვილოს რეალობაზე, რათა დაინახოს სამყარო ისეთი, როგორიც ის დღეს არის. მინდა ნათლად ვთქვა: არ უნდა დაიღვაროს ცრემლები ირანის რეჟიმისთვის, რომელმაც სიკვდილი და რეპრესიები მოუტანა საკუთარ ხალხს. მათ 17 000 საკუთარი ახალგაზრდა დახოცეს. ამ რეჟიმმა კი რეგიონში განადგურება და დესტაბილიზაცია გამოიწვია თავისი მოკავშირეების მეშვეობით, რომლებიც შეიარაღებულები არიან რაკეტებითა და დრონებით. ბევრმა ირანელმა, ქვეყნის შიგნით, ევროპასა და მსოფლიოში, იზეიმა აიათოლა ხამენეის გარდაცვალება. ისევე როგორც რეგიონში კიდევ ბევრმა ადამიანმა. ისინი იმედოვნებენ, რომ ეს მომენტი თავისუფალი ირანისკენ გზას გახსნის. ირანელი ხალხი იმსახურებს თავისუფლებას, ღირსებას და საკუთარი მომავლის გადაწყვეტის უფლებას - მაშინაც კი, თუ ვიცით, რომ ეს სავსე იქნება საფრთხითა და არასტაბილურობით ომის დროს და მის შემდეგ“, - აღნიშნა ევროკომისიის პრეზიდენტმა.
მისი თქმით, ახლა სახეზეა რეგიონული კონფლიქტი, გაუთვალისწინებელი შედეგებით.
„ჩვენ ყოველთვის შევინარჩუნებთ და დავიცავთ წესებზე დამყარებულ სისტემას, რომელიც მოკავშირეებთან ერთად ავაშენეთ, მაგრამ ჩვენ მხოლოდ ამ სისტემას ვეღარ დავეყრდნობით ჩვენი ინტერესების დასაცავად. ჩვენ ვერ ჩავთვლით, რომ ეს სისტემა დაგვიცავს კომპლექსური საფრთხეებისგან, რომლის წინაშეც ვართ. ჩვენ უნდა ავაშენოთ ჩვენი ევროპული გზა და ვიპოვოთ ახალი გზები პარტნიორებთან თანამშრომლობისთვის. მეორე, რაც აუცილებელია, ჩვენ უნდა შევხედოთ მკაფიოდ და მკაცრად ჩვენს საგარეო პოლიტიკას დღევანდელ მსოფლიოში. მათ შორის, თუ როგორი ხდება ამ პოლიტიკის ფორმირება და გატარება.“, – განაცხადა ურსულა ფონ დერ ლაიენმა.
