უკრაინის პრეზიდენტ ვოლოდიმირ ზელენსკისთან შეხვედრის შემდეგ, ევროკომისიის პრეზიდენტმა ურსულა ფონ დერ ლაიენმა აღნიშნა, რომ სამშვიდობო მოლაპარაკებებში უკრაინას გრძელვადიან პერსპექტივაში უნდა მიეცეს უსაფრთხოების გარანტიები, როგორც ევროკავშირის თავდაცვის პირველ ხაზს. ამის შესახებ ფონ დერ ლაიენი Х-ზე წერს.
„ჩვენ პრეზიდენტ ზელენსკის დავუდასტურეთ, რომ ევროკავშირი ურყევი და ერთგული რჩება თავისი პრინციპების მიმართ. უკრაინის სუვერენიტეტი პატივისცემით უნდა იქნას დაცული. უკრაინის უსაფრთხოება გრძელვადიან პერსპექტივაში უნდა იყოს გარანტირებული, როგორც ჩვენი კავშირის თავდაცვის პირველი ხაზი,“ - განაცხადა ევროკომისიის პრეზიდენტმა.
ფონ დერ ლაიენმა აღნიშნა, რომ სამშვიდობო მოლაპარაკებების დროს „ევროკავშირი ურყევად უჭერს მხარს უკრაინას“.
„დაფინანსების შესახებ ჩვენი წინადადებები უკვე მაგიდაზეა. მიზანი ძლიერი უკრაინაა, როგორც ბრძოლის ველზე, ასევე მოლაპარაკებების მაგიდასთან,“ - თქვა მან.
ევროკომისიის პრეზიდენტმა აღნიშნა, რომ ეს პრიორიტეტები ნატო-ს გენერალურ მდივან მარკ რუტესთან განხილვის მთავარი თემა იყო.
„ევროპა გააგრძელებს წვლილის შეტანას უკრაინაში სამართლიანი და მდგრადი მშვიდობის მისაღწევად ყველა მცდელობაში,“ - განაცხადა ურსულა ფონ დერ ლაიენმა.
