აშშ-ის ოფიციალური პირები შეშფოთებული არიან დონალდ ტრამპის ადმინისტრაციის წარმომადგენლებსა და პუტინის სპეციალურ წარმომადგენელს, კირილ დმიტრიევს შორის გამართულ შეხვედრასთან დაკავშირებით, რომლის შედეგადაც, ომის დასრულების ახალი გეგმა შემუშავდა.
ინფორმაციას ამის შესახებ საინფორმაციო სააგენტო Reuters ავრცელებს - წყაროების ცნობით, გეგმის შემუშავებაში არ მონაწილეობდა სახელმწიფო დეპარტამენტი და უსაფრთხოების საბჭო.
სააგენტოს ცნობით, ეს შეხვედრა ოქტომბრის ბოლოს მაიამიში შედგა და მას დმიტრიევი, ტრამპის სპეციალური წარმომადგენელი სტივ უიტკოფი და ტრამპის სიძე ჯარედ კუშნერი ესწრებოდნენ.
Reuters-ის ცნობით, „28-პუნქტიანი გეგმა“, რომელიც მოგვიანებით Axios-მა გამოაქვეყნა, აშშ-ის ოფიციალური პირებისთვის მოულოდნელი აღმოჩნდა.
სააგენტოს წყაროების ცნობით, აშშ-ის სახელმწიფო დეპარტამენტისა და უშიშროების საბჭოს ბევრი მაღალი თანამდებობის პირი ამ გეგმის შესახებ ინფორმირებული არ იყო.
გავრცელებული ინფორმაციით, მოლაპარაკებებიდან ასევე მოხსნეს ტრამპის სპეციალური წარმომადგენელი უკრაინაში, კიტ კელოგი.
Reuters-ის ერთ-ერთი წყარო ამბობს, რომ ახალი „სამშვიდობო გეგმის“ შესახებ აშშ-ის სახელმწიფო მდივანს, მარკო რუბიოსაც კი არ ჰქონდა ინფორმაცია: „კოორდინაცია არ ყოფილა, სახელმწიფო დეპარტამენტში არავის უნახავს ის, რუბიოსაც კი“.
სააგენტოს წყარომ დასძინა, რომ გეგმა შეიცავს პუნქტებს, რომლებიც სახელმწიფო მდივანმა ადრე უარყო.
ამასთან, სახელმწიფო დეპარტამენტი აცხადებს, რომ რუბიო უშუალოდ იყო ჩართული გეგმის შემუშავებაში „მთელი პროცესის განმავლობაში“.
