ე.წ. აგენტების კანონის საწინააღმდეგო აქციაზე პარლამენტის ჯებირის დაზიანებისთვის დაკავებულმა საბა მეფარიშვილმა და ომარ ოკრიბელაშვილმა წელიწადნახევრის შემდეგ საპატიმრო დატოვეს.
საბა მეფარიშვილი და ომარ ოკრიბელაშვილი 2024 წლის 14 მაისს პროევროპულ აქციებზე დააკავეს. პროკურატურა მათ 400-ლარიანი ჯებირის ჯგუფურად დაზიანებას ედავებოდა.
20 იანვარს სასამართლო სხდომაზე ომარ ოკრიბელაშვილმა და საბა მეფარიშვილმა აღიარეს მათ მიმართ წაყენებული ბრალი, რის შემდეგაც თბილისის საქალაქო სასამართლოში მათ საპროცესო შეთანხმება გაუფორმდათ.
მოსამართლე ნათია გუდაძემ ბრალდებულებს სასჯელის სახედ 3 წელი განუსაზღვრა, თუმცა 2024 წლის 17 სექტემბრის ამნისტიის შედეგად, მათ ეს სასჯელი 2,5 წელი გაუხდათ. აქედან მსჯავრდადებულებმა 1,5 წელი რეალური სასჯელი მოიხადეს , 1 წელი კი პირობითი სასჯელი განესაზღვრათ.
ცნობისთვის, 18 აპრილს ოკრიბელაშვილისა და მეფარიშვილის ადვოკატმა, მიხეილ ყაველაშვილს პატიმრების შეწყალების თხოვნით მიმართა, თუმცა ყაველაშვილმა ისინი არ შეიწყალა.
