კარიბის ზღვის აუზში ქარიშხალ "მელისას" შედეგად დაღუპულთა რიცხვი გაიზარდა.

30 ოქტომბრის საღამოს მონაცემებით, ორ კუნძულოვან სახელმწიფოში სულ 49 ადამიანი დაიღუპა.

იამაიკის ინფორმაციის მინისტრის განცხადებით, ქარიშხლის შედეგად 19 ადამიანი დაიღუპა. ჰაიტის ხელისუფლების ცნობით, კი წყალდიდობამ სულ მცირე 30 ადამიანი იმსხვერპლა, მათ შორის 10 ბავშვია.

იამაიკა და ჰაიტი არ გამორიცხავენ, რომ მიმდინარე სამძებრო-სამაშველო ოპერაციების დროს დაღუპულთა რიცხვი გაიზარდოს.

ჰაიტიში კიდევ 20 ადამიანი დაკარგულად ითვლება. ქარიშხალმა მნიშვნელოვნად დააზიანა იამაიკის ინფრასტრუქტურა, კუნძულზე ამ დრომდე დაახლოებით 500 000 ადამიანი ელექტროენერგიის გარეშე რჩება.

სამაშველო სამუშაოები მიმდინარეობს კუბაზეც, სადაც სტიქიის შედეგებს ებრძვიან. კუნძულზე მსხვერპლი არ დაფიქსირებულა. აღმოსავლეთ კუბის ბევრი რაიონი კვლავ დატბორილია, 730 000-ზე მეტი ადამიანი ევაკუირებულია.

შეერთებულმა შტატებმა დახმარების ჯგუფები გაგზავნა დომინიკს რესპუბლიკაში, იამაიკაში, ჰაიტისა და ბაჰამის კუნძულებზე.

სახელმწიფო მდივან მარკო რუბიოს განცხადებით, აშშ ასევე მზადაა, დახმარება გაუწიოს კუბაზე ქარიშხლის შედეგად დაზარალებულებს.

ამჟამად ქარიშხალი ბერმუდის კუნძულებისკენ მიემართება, მისი ეპიცენტრი კი ბრიტანეთის საზღვარგარეთის ტერიტორიიდან დასავლეთით დაახლოებით 400 კმ-ში მდებარეობს.

აშშ-ის ქარიშხლების ეროვნული ცენტრის ინფორმაციით, ქარიშხლის მაქსიმალური სიჩქარე საათში 155 კმ იქნება. უწყების ცნობით, წყალდიდობა კვლავ მოსალოდნელია კუბაზე, იამაიკაზე, ჰაიტისა და დომინიკის რესპუბლიკაში.

ისტორიაში ყველაზე ძლიერი ქარიშხალი, „მელისა“, იამაიკას 29 ოქტომბერს დაატყდა თავს და მე-5 კატეგორიას მიაღწია, რაც ყველაზე მაღალი დონეა.