აშშ-ის პრეზიდენტმა დონალდ ტრამპმა განაცხადა, რომ არ დაუშვებს, უკრაინაში ომი გლობალურ კონფლიქტში გადაიზარდოს.
ამის შესახებ ტრამპმა თეთრ სახლში გამართულ პრესკონფერენციაზე განაცხადა.
ჟურნალისტებთან საუბრისას ტრამპმა რუსეთის პრეზიდენტ ვლადიმირ პუტინთან ბოლო სატელეფონო საუბრისა და უნგრეთში მასთან შეხვედრის გეგმების შესახებ ილაპარაკა.
მისი თქმით, მოლაპარაკებები ომის დასრულების გზების ძიებას ისახავს მიზნად.
„ამ სიტუაციაში აღმოვჩნდი - ეს ომი მე არ დამიწყია. ეს ბაიდენის საქმეა. და მე შევედი და იქ სრული არეულობა იყო, რაც მესამე მსოფლიო ომამდე შეიძლებოდა მისულიყო. ჩემი აზრით, ეს შეიძლებოდა მომხდარიყო. მაგრამ ეს არ მოხდება“, - აღნიშნა ტრამპმა.
მან აღნიშნა, რომ აპირებს სიცოცხლეების გადარჩენას და ევროპაში მშვიდობის ხელშეწყობას. მისი თქმით, ბაიდენის ადმინისტრაციამ დაუშვა სტრატეგიული შეცდომები, რამაც რუსეთის მიერ უკრაინაში სრულმასშტაბიანი შეჭრა გამოიწვია, მაშინ როდესაც მისი პრეზიდენტობის დროს ასეთი აგრესია არ მოხდებოდა.
„მე ამას სიცოცხლის გადასარჩენად ვაკეთებ. ეს არის ის, რისთვისაც ვაკეთებ ამას. ამას ჩვენთვის არ ვაკეთებ - ჩვენს შორის ოკეანეა. მე მინდა დავეხმარო ევროპას. მათ ომის დასრულება სურთ, მაგრამ არ შეუძლიათ. მაგრამ მე შემიძლია“, - თქვა ტრამპმა.
აშშ-ის პრეზიდენტი ასევე შეეხო უკრაინისა და რუსეთის ლიდერებს შორის ურთიერთობების საკითხს და მათ „საშინელი“ უწოდა, რაც ერთობლივი შეხვედრების ორგანიზებას ართულებს.
მან ასევე დაადასტურა, რომ პუტინთან უკრაინისთვის Tomahawk -ის რაკეტების მიწოდებაზე ისაუბრა და აღნიშნა, რომ რუსეთის ლიდერი ამ იდეით დიდად მოხარული არ დარჩენილა“.
