პოლონეთის ვიცე-პრემიერი და საგარეო საქმეთა მინისტრი რადოსლავ სიკორსკი აცხადებს, რომ ერთ სატელეფონო ზარს შეუძლია რუსეთის მიერ უკრაინის წინააღმდეგ სრულმასშტაბიანი ომის დასრულება.

სიკორსკის თქმით, უკრაინაში ომის დასასრულებლად მხოლოდ კრემლის ლიდერის, ვლადიმირ პუტინის გადაწყვეტილებაა საჭირო რუსული ჯარების გაყვანის შესახებ და მისგან სატელეფონო ზარი რუსეთის გენერალური შტაბის უფროსთან, ვალერი გერასიმოვთან.

სიკორსკის თქმით, სწორედ ამიტომ უკრაინაში ომის დასრულება უფრო ადვილია, ვიდრე ახლო აღმოსავლეთში კონფლიქტის.

სიკორსკის ჰკითხეს, იზრდება თუ არა პუტინის მიერ გერასიმოვთან დარეკვის შანსი, სიკორსკიმ უპასუხა, რომ „ის მაშინ იზრდება, როდესაც რუსეთის ეკონომიკა შენელებას იწყებს“.

„უკრაინამ აჩვენა, რომ 10 წლის განმავლობაში პუტინს დონბასში აკავებს. პუტინი არ იმარჯვებს. ჩვენ უნდა გამოვავლინოთ ჩვენი მზადყოფნა, მხარი დავუჭიროთ უკრაინას საშუალოვადიან პერსპექტივაში და განვახორციელოთ ჩვენი დასავლური სანქციები რუსული ნავთობის, გაზისა და ტექნოლოგიების წინააღმდეგ“, - განაცხადა სიკორსკიმ.