იმისათვის, რომ რუსეთი ვაიძულოთ დაასულოს ომი, საჭიროა მეტი სანქცია, ბრიუსელში იწყება სანქციების ახალ პაკეტზე მუშაობა. ამის შესხაებ ევროპის საბჭოს პრეზიდენტმა ანტონიო კოშტამ განაცხადა.
მისი თქმით, ევროპული გუნდი ვაშინგტონში მიემგზავრება, რათა ამერიკელ პარტნიორებთან ერთად ამ საკითხზე იმუშაოს.
„ჩვენ ვმუშაობთ შეერთებულ შტატებთან და სხვა პარტნიორებთან, რათა გავზარდოთ ჩვენი ზეწოლა შემდგომი სანქციების, პირდაპირი სანქციების და მეორადი სანქციების გზით.
საჭიროა მეტი ეკონომიკური ზომები, რათა რუსეთი ვაიძულოთ, შეწყვიტოს ეს ომი, შეწყვიტოს ადამიანების მკვლელობა, შეწყვიტოს ეს ომი უკრაინაში.
ბრიუსელში ახალი სანქციების პაკეტზე მუშაობა იწყება და ჩვენი გუნდი, ევროპული გუნდი, ვაშინგტონში მიემგზავრება, რათა ჩვენს ამერიკელ მეგობრებთან ერთად იმუშაოს“, - განაცხადა კოშტამ უჟგოროდში უკრაინის პრეზიდენტ ვოლოდიმირ ზელენსკისთან ერთად გამართულ ერთობლივ პრესკონფერენციაზე.
მან ხაზგასმით აღნიშნა, რომ ევროპა უკრაინასთან ერთად მუშაობს საერთო მომავლისთვის, მხარს უჭერს უკრაინის აღდგენას და მის გზას ევროკავშირში გაწევრიანებისკენ.
„ცხადია, რომ უკრაინის ევროკავშირში წევრობა არა მხოლოდ უსაფრთხოების საუკეთესო გარანტიაა, არამედ უკრაინელებისთვის კეთილდღეობისა და უკეთესი მომავლისკენ მიმავალი ყველაზე ეფექტური გზაც“, - დასძინა კოშტამ.
მან აღნიშნა, რომ ევროკავშირი შთაბეჭდილებას ახდენს იმ რეფორმებით, რომლებსაც უკრაინა ომის მიუხედავად ახორციელებს, მისივე თქმით, მუშაობა უნდა გაგრძელდეს.
„ჩვენ მხარს გიჭერთ ამ ომში, რომელიც გრძელდება. ჩვენ მხარს ვუჭერთ თქვენს მცდელობებს მშვიდობის მისაღწევად, სამშვიდობო მოლაპარაკებებში. და ჩვენ ასევე მხარს ვუჭერთ თქვენს, როგორც ევროკავშირის სრულუფლებიანი წევრის მომავალს“, - განაცხადა ევროპული საბჭოს პრეზიდენტმა.
