აშშ-ის პრეზიდენტმა დონალდ ტრამპმა განაცხადა, რომ მას კვლავ სურს დაეხმაროს კიევსა და მოსკოვს სამშვიდობო შეთანხმების მიღწევაში, მიუხედავად იმისა, რომ უკრაინის პრეზიდენტ ვოლოდიმირ ზელენსკის და კრემლის ლიდერ ვლადიმირ პუტინს შორის პირისპირ შეხვედრის პერსპექტივები გაურკვევლია. ამის შესახებ ტრამპმა CBS News-თან ინტერვიუში ისაუბრა.
„ვფიქრობ, ამას მოვაგვარებთ. გულწრფელად რომ ვთქვა, მეგონა, რომ რუსეთის პრობლემა ყველაზე მარტივი იქნებოდა იმ პრობლემებიდან, რომლებსაც მე შევეხე, მაგრამ, როგორც ჩანს, ის სხვებთან შედარებით ცოტა უფრო რთულია,“ - განაცხადა ტრამპმა.
მან დასძინა, რომ ყურადღებით აკვირდება, თუ როგორ იქცევიან ამჟამად ზელენსკი და პუტინი.
„მე ვაკვირდები, ვხედავ და ამას პრეზიდენტ პუტინთან და პრეზიდენტ ზელენსკისთან განვიხილავ. რაღაც მოხდება, მაგრამ ისინი ჯერ მზად არ არიან. მაგრამ რაღაც მოხდება. ჩვენ ამას გავაკეთებთ“, - თქვა ტრამპმა.
მან დასძინა, რომ სისხლიანი ბრძოლებისა და მშვიდობიან მოსახლეობაზე რუსეთის თავდასხმების მიუხედავად, ის გააგრძელებს სამშვიდობო შეთანხმების მიღწევის ძალისხმევას.
ტრამპმა განმარტა, რომ მისი მიდგომა მრავალი დიპლომატიური მოლაპარაკებისადმი გულისხმობს ლიდერების ერთ ოთახში შეკრებას და მათ იძულებას, რეალურ დროში, უმეტესად მისი ხელმძღვანელობით, მიაღწიონ შეთანხმებას და უარი არ თქვან არცერთ შესაძლებლობაზე, ვიდრე ეს არ მოხდება.
მან ხაზი გაუსვა, რომ ეს მიდგომა მოთმინებას მოითხოვს.
შეკითხვაზე, უწევს თუ არა ხანდახან „დაელოდოს საკითხების მოგვარებას“, ტრამპმა უპასუხა: „ეს არის ის, რაც უნდა გააკეთო“.
„საბედნიეროდ, რამდენიმე მართლაც კარგი დღე გვქონდა და როგორც კი ყველას ერთ ოთახში ვკრებ, ან სულ მცირე, ვახერხებ, ერთმანეთთან ისაუბარონ, გამოსავალს პოულობენ. ჩვენ მილიონობით სიცოცხლე გადავარჩინეთ“, - თქვა ამერიკის პრეზიდენტმა.
