ეს არაჩვეულებრივი ქალაქი, ეს არაჩვეულებრივი უბანი იმსახურებს იმას, რომ სულ მცირე, არ გეშინოდეს წვიმის, მიწისძვრის, შენობების თავზე დამხობის. ამისთვის ფულიც არის, ოღონდ იმ ფულს სწორად გადანაწილება სჭირდება, - ამის შესახებ “ლელო-ძლიერი საქართველოს” თბილისის ვიცე-მერობის კანდიდატმა ალეკო ელისაშვილმა მთაწმინდის მაჟორიტარობის კანდიდატის წარდგენის ღონისძიებაზე სიტყვით გამოსვლისას განაცხადა.
ელისაშვილის თქმით, მას სჯერა, რომ ადგილობრივი არჩევნებით “ქართულ ოცნებას” თბილისსაც და საქართველოსაც გამოგლეჯენ.
“ჯერ კიდევ თბილისს ჰყავს მერი, რომელმაც ერთადერთხელ ახსენა მთაწმინდა და ისიც უხამსად გაახსენდა. ერთადერთხელ გაახსენდა მთაწმინდა და არც კი დაფიქრებულა, იმდენად არ ადარდებს ეს ქალაქი, რომ არც დაფიქრებულა, რა ჰქვია ამ უბანს - მამა დავით გარეჯელის უბანი ჰქვია. სანამ გარეჯში სამონასტრო ცხოვრებას დაიწყებდა და იმ არაჩვეულებრივ სიწმინდეს შექმნიდა, რომლითაც ვამაყობთ, მანამდე აქ იყო ერთ-ერთი ასურელი მამათაგანი და ჩვენს მერს, ჯერ კიდევ 4 ოქტომბრამდე რომ არის, მარტო ასე გაახსენდა.
ჩვენ გვახსოვს ეს ქალაქი, ეს უბანი და გვტკივა ეს ყველაფერი. ჩვენ არც “ფერარებით” დავდივართ და არც “ლამბორგინებით”. აქ რაც არის, ყველაფერი მაწუხებს, ორმოებიდან დაწყებული, რომელიც ამოუვსებელია, დამთავრებული იმ შენობებით, რომელიც კი ლამაზია, მაგრამ როგორც კი კარს შეაღებ და ეზოში შეხვალ, მიხვდებით, რა ვითარებაში ცხოვრობს ხალხი. ვიცი, რა დარდიც აქვთ ამ ადამიანებს, ვინც ამ უბანში ცხოვრობენ, თავზე ენგრევათ სახლები. ჯერ კიდევ 2002 წლის აპრილის მიწისძვრიდან მოყოლებული, შუაზე გადახსნილია შენობები, კაცი პატრონი არ არის და იმ დროს, როდესაც კალაძე რვა წელია, მერია და ერთადერთხელ გაახსენდა მთაწმინდა, ისიც ამაზრზენ კონტექსტში, არცერთ ეზოში არ მოსულა, არცერთი ეზოს კარი არ შეუღია, არცერთ სადარბაზოში არ ასულა, არცერთ შუაზე გადახლეჩილ შენობასთან არ გაჩერებულა, ამ დროს კი გამოდის მთავრობა და იძახის, რომ ახალი სტადიონი უნდა ავაშენოთო. 876 მილიონად უნდა ააშენონ აეროპორტთან ახალიო სტადიონი. იმდენად მოწყდნენ რეალობას, თორემ წალენჯიხაში ჩავიდოდა კაცი 5-მილიონიანი მანქანით?
ეს არაჩვეულებრივი ქალაქი, ეს არაჩვეულებრივი უბანი იმსახურებს იმას, რომ სულ მცირე, არ გეშინოდეს წვიმის, მიწისძვრის, შენობების თავზე დამხობის. ამისთვის ფულიც არის, ოღონდ იმ ფულს სწორად გადანაწილება სჭირდება. ფულს კი არ უნდა იპარავდე და “ლამბორგინებსა” და “ფერარებს” კი არ უნდა ყიდულობდე.
ეს ქალაქი უნდა გახდეს უსაფრთხო ქალაქი, თბილისიც უნდა დავიბრუნოთ, მთელი საქართველოც. ვიღაცებს ამის თქმის ეშინიათ იმიტომ, რომ არ სჯერათ - უნდა გამოვგლიჯოთ ეს ქალაქი. ჩვენ ამის გვჯერა, ჩვენ ამას შევძლებთ და მოვახერხებთ”, - განაცხადა ელისაშვილმა.
