აშშ-ის პრეზიდენტმა დონალდ ტრამპმა ეჭვი გამოთქვა, რომ უკრაინის პრეზიდენტ ვოლოდიმირ ზელენსკის და რუსეთის პრეზიდენტ ვლადიმირ პუტინს შორის შეხვედრა უახლოეს მომავალში გაიმართება. იუწყება Daily Caller.
რაც შეეხება მისი მონაწილეობით სამმხრივ შეხვედრას, ტრამპი მიიჩნევს, რომ ის შესაძლოა შედგეს.
„შესაძლოა სამმხრივი შეხვედრა შედგეს. ორმხრივი - არ ვიცი“, - თქვა ტრამპმა.
ტრამპმა ზელენსკი და პუტინი ასევე შეადარა ბავშვებს, რომლებსაც ერთმანეთი სძულთ და სათამაშო მოედანზე ჩხუბობენ.
„მე ანალოგიას ვიყენებ. რამდენჯერმე გამომიყენებია. გყავს შვილი და სათამაშო მოედანზე კიდევ ერთი ბავშვია, მათ ერთმანეთი სძულთ და იწყებენ მუშტების ქნევას. და თქვენ გინდათ, რომ გაჩერდნენ, ისინი კი განაგრძობენ. გარკვეული დროის შემდეგ, ისინი ძალიან ბედნიერები არიან, რომ ჩერდებიან. გესმით ეს? ეს არის დაახლოებით ასე. ზოგჯერ მათ ცოტა ბრძოლა უწევთ, ვიდრე მათ შეაჩერებ. თუმცა ეს დიდი ხანია გრძელდება. ბევრი ადამიანი დაიღუპა“, - თქვა ტრამპმა.
გარდა ამისა, მან განცხადება გააკეთა აშშ-ის მონაწილეობასთან დაკავშირებით უკრაინისთვის უსაფრთხოების გარანტიების უზრუნველყოფაში.
აშშ-ის პრეზიდენტმა დაადასტურა, რომ ის არ განიხილავს ამერიკელი ჯარისკაცების უკრაინაში გაგზავნის შესაძლებლობას, თუმცა აღნიშნა, რომ თუ საომარი მოქმედებები შეწყდება, ის ევროპელებს საჰაერო უსაფრთხოების უზრუნველყოფაში დაეხმარება.
აშშ-ის პრეზიდენტმა კიდევ ერთხელ გაიმეორა, რომ უკრაინაში ომი მან არ დაიწყო, მაგრამ მისი დასრულება სურს.
„ჩვენ ბევრ სიცოცხლეზე ვსაუბრობთ. ეს ომი მემკვიდრეობით მივიღე. და მე მხოლოდ ცეცხლის ჩაქრობას ვცდილობ. და ვფიქრობდი, რომ ეს შევძელი. ეს შვიდჯერ გავაკეთე სხვა ომებში, რომლებიც ამაზე უფრო რთული იყო... ამ ომებიდან სამი 30 წელზე მეტხანს გრძელდებოდა და ყველა მე დავასრულე. ეს ომი უბრალოდ ძალიან რთული იყო. ეს იყო რთული ომი“, - თქვა ტრამპმა.
