The Telegraph-ის ცნობით, აშშ-ის პრეზიდენტი დონალდ ტრამპი უკრაინისთვის შესაძლო უსაფრთხოების გარანტიების ფარგლებში ამერიკული კერძო სამხედრო კომპანიების ჩართვის ინიციატივით გამოვიდა, რომლებიც ფორტიფიკაციასთან დაკავშირებით უნდა დახმარებოდნენ და შემაკავებელი ძალის როლი შეესრულებინათ.
როგორც გამოცემა იუწყება, ევროპულ ქვეყნებთან სამშვიდობო შეთანხმების ფარგლებში უკრაინისთვის პოტენციური უსაფრთხოების გარანტიების შესახებ მოლაპარაკებების დროს ტრამპმა, სავარაუდოდ, შესთავაზა ამერიკულ მხარეს კერძო სამხედრო კომპანიების ჩართვა, რომლებიც ევროპელი პარტნიორების ძალისხმევას შეავსებდნენ.
იდეა იმაში მდგომარეობს, რომ ამ ამერიკულ კომპანიებს შეუძლიათ მონაწილეობა მიიღონ საფორტიფიკაციო სტრუქტურების გაძლიერებაში, ახალი სამხედრო ბაზების მშენებლობასა და ამერიკული ბიზნესის დაცვაში უკრაინის ტერიტორიაზე, ამერიკელი კონტრაქტორების ყოფნა კი რუსეთისთვის დამატებითი შემაკავებელი ფაქტორი იქნება.
სავარაუდოდ, წინადადება განიხილება სხვა ზომებთან ერთად, რომელთა შეთავაზებაზეც შეთანხმდნენ „მსურველთა კოალიციის“ ქვეყნები.
წყაროების ცნობით, კერძო სამხედრო კონტრაქტორების გამოყენება ტრამპს, რომელმაც უკვე დადო პირობა, რომ ამერიკელ ჯარისკაცებს უკრაინაში არ გაგზავნის, საშუალებას მისცემს, დაამშვიდოს ტრამპისტების ყველაზე იზოლაციონისტური ფრთის შიში.
დასავლეთის ქვეყნების „ათზე მეტ“ ოფიციალურ პირთან კომუნიკაციის საფუძველზე, ჟურნალისტებმა შეიტყვეს უკრაინისთვის „უსაფრთხოების გარანტიების“ ძირითადი იდეების შესახებ, რომელთა განხილვაც დღემდე გრძელდება.
საბოლოო დეტალების, მათ შორის საჰაერო პატრულირების, წვრთნებისა და შავ ზღვაში საზღვაო მისიის შესახებ, შესაძლოა, უახლოეს დღეებში გახდეს ცნობილი.
ევროპელების მიერ გეგმაზე მუშაობა, სავარაუდოდ, გააქტიურდა აშშ-სა და რუსეთის ლიდერების ალასკაში შეხვედრისა და ტრამპის განცხადების შემდეგ, რომ პუტინი, სავარაუდოდ, დასავლელი პარტნიორების მიერ უკრაინისთვის უსაფრთხოების გარანტიების წინააღმდეგი არ იქნებოდა.
ევროპელი ოფიციალური პირები აცხადებენ, რომ ახალი „ცხელი“ ომის თავიდან აცილების მთავარი ამოცანა უკრაინის არმიის გაძლიერებაა - ის რუსეთისთვის მთავარი შემაკავებელი ფაქტორი უნდა იყოს.
როგორც გამოცემა აღნიშნავს, ვარაუდობენ, რომ პოტენციური სამშვიდობო შეთანხმების ფარგლებში „ფრონტის ხაზზე გამაგრებულ საზღვარზე“ სწორედ უკრაინული ძალები განლაგდებიან.
