საკადრო ცვლილება ჯანსაღი პროცესია, მამუკა მდინარაძე მაღალი დონის პროფესიონალია და სამართალდამცავ უწყებებში მუშაობის გამოცდილება აქვს, – ამის შესახებ, საზოგადოებრივი მაუწყებლის ცნობით, პარლამენტის საპროცედურო საკითხთა კომიტეტის თავმჯდომარე დავით მათიკაშვილმა განაცხადა.
დავით მათიკაშვილს ასევე კითხვა დაუსვეს სუს-ის თანამდებობაზე მამუკა მდინარაძის დანიშვნის გადაწყვეტილებასა და ოპოზიციის განცხადებებზე, რაზეც მათიკაშვილმა აღნიშნა:
„სახელმწიფოში საკადრო გადაადგილება ჯანსაღი პროცესია. ამიტომ, ამაში გასაკვირი არაფერია. ანრი ოხანაშვილი ქვეყნის უსაფრთხოების სადარაჯოზე რჩება, მისი გამოცდილება ახალი ფუნქციების შესრულებაში წაადგება. მას გაწეული სამუშაოსთვის მადლობას ვუხდი. მამუკა მდინარაძეს კი წარდგენა არ სჭირდება, ის მაღალი დონის პროფესიონალია, რომელსაც სამართალდამცავ უწყებებში მუშაობის გამოცდილება აქვს. მამუკა მდინარაძე საკუთარი ქვეყნის გამორჩეული პატრიოტია. რაც შეეხება რადიკალების განცხადებებს, თუ ვინმე და რამეა ქვეყანაში ჩამოშლილი და ჩამონგრეული, ეს რადიკალური ოპოზიციაა, რომელიც ლაბირინთიდან თავგზას ვერ იგნებს, ამ ლაბირინთებიდან ვეღარ გამოდის. დღეს რადიკალური ოპოზიცია უსუსტეს მდგომარეობაშია. 90-იანი წლებიდან დღემდე, საქართველო ყველაზე დამოუკიდებელია ძლიერი ინსტიტუციებით. ოპოზიციის განცხადებები როგორი სუსტია, ამას საზოგადოება ხედავს“.
შეგახსენებთ, მამუკა მდინარაძე სახელმწიფო უსაფრთხოების სამსახურის ხელმძღვანელის თანამდებობაზე ანრი ოხანაშვილს შეცვლის. ანრი ოხანაშვილი ეროვნული უსაფრთხოების საკითხებში საქართველოს პრემიერ-მინისტრის მრჩევლის თანამდებობას დაიკავებს.
