ფინეთის პრეზიდენტმა ალექსანდრ სტუბმა იმედი გამოთქვა, რომ დონალდ ტრამპი მალე დაკარგავს მოთმინებას რუსეთის მიმართ, რაც უკრაინის წინააღმდეგ ომის დასასრულს მოაახლოვებს. ამის შესახებ სტუბმა Helsingin Sanomat-თან ინტერვიუში განაცხადა.
სტუბმა განაცხადა, რომ მსოფლიო თანდათან მიიწევს იმ წერტილისკენ, როდესაც უკრაინაში ცეცხლის შეწყვეტის მიღწევა და, საბოლოო ჯამში, უფრო ხანგრძლივი მშვიდობის დამყარება იქნება შესაძლებელი.
მისი აზრით, ერთადერთი, ვისაც შეუძლია ვლადიმირ პუტინს ამის გაკეთება აიძულოს, ტრამპია.
„რა თქმა უნდა, მსურს, რომ სანქციების ან ტარიფების მეშვეობით უფრო ადრე შევძლოთ ზავის მიღწევა“, - თქვა მან.
ფინეთის პრეზიდენტმა ხაზი გაუსვა, რომ რუსული ნავთობის შეძენის გამო ინდოეთის წინააღმდეგ აშშ-ის სანქციების შემდეგ, პუტინს მაშინვე სურდა ტრამპთან შეხვედრა, ამიტომ არ არსებობს საფუძველი ვიფიქროთ, რომ ასეთი ზომები მომავალში ეფექტური ვერ იქნება.
სტუბი მიიჩნევს, რომ ახლა კითხვა იმაში მდგომარეობს, თუ როდის დაკარგავს ტრამპი მოთმინებას პუტინის მიმართ: „ვიმედოვნებთ, რომ ამ ეტაპამდე მივალთ, რადგან ეს ხელს შეუწყობს კონფლიქტის მშვიდობიან მოგვარებას“, - თქვა ფინეთის პრეზიდენტმა.
